“Интер” янги мавсумда қандай кўриниш ҳосил қилиши мумкин?

2012-йилдан бери илк бор Чемпионлар Лигасига қайтган Миланнинг “Интер” клуби яна бир марта Европанинг топ клуби мақомига эришиш учун ҳаракат қилиб кўради.

“Нерадзуррилар” ўтган мавсумнинг сўнгги турида пойтахт клуби – “Лацио”ни 3-2 ҳисобида енгиб тўртинчи ўринни эгаллаган эди.

“Интер” Чемпионлар Лигаси ёғдуси сабаб таркибни кучайтириш учун аллақачон бир неча сара футболчиларни олиб келган. Лучано Спалетти бу ёзда нақ етти трансферни амалга ошириб бўлди. Раджа Наингголан, Лаутаро Мартинес, Федерико Димарко, Стефан Де Врей ва Квадво Асамоалар тўлиқ асосда келиб қўшилган бўлса, Шиме Врсалько ва Маттео Политано ижара асосида таркибни тўлдирди.

Ушбу янги футболчилар бир неча мавсумлардан бери кучсиз ўйин намойиш этиб келган 18 карра А Серия чемпионларини яна юқори поғоналарга олиб чиқиш учун ёрдам беришлари керак. Бироқ қандай қилиб 2010-йилги требль эгаларини яна Италия ва Европада топ клубга айлантира олади? Қуйида Спалетти жамоасининг эҳтимолий асосий таркиби, бўлажак юлдузлари ҳақида таҳлил юритамиз.

1-вариант: тўлиқ куч

4-2-3-1: Ҳанданович; Врсалько, Де Врей, Скриньяр, Асамоа; Модрич, Брозович; Кандрева, Наингголан, Перишич; Икарди.

Барча футболчилар тўлиқ спорт формасида бўлганида ушбу таркиб янги мавсумда “Интер”нинг асосий таркиби бўлади.

Дарвозада, 2012-йилда “нерадзуррилар” сафига келиб қўшилган Самир Ханданович эгаллайди.

Ҳимоя тўртлигида икки янги трансфер вакиллари бор. Булардан бири Мундиалда Хорватия билан қаҳрамонлик кўрсатган Врсалько. Ўтганм мавсумда у “Атлетико Мадрид” таркибида Европа Лигасини ютиб олди. “Интер”да эса ҳеч шубҳасиз илк дақиқаларданоқ майдонга тушиши кафолатланган. Чап қанот ҳимоясида эса “Интер”ни тарк этган Давиде Сантон ўрнига олиб келинган Квадво Асамоа.

Ҳимоя марказида эса янги ҳамкор жуфтлик – Де Врей ва Милан Скриньяр ҳаракат қилади. Мирандасиз улар “Лацио”га қарши ўйинда нималарга қодирлигини кўрсатиб қўйишди.

Ўзининг янги версиясида “Интер” назарий жиҳатдан “Реал”дан Лука Модрични олиб келишга яқин ва у Италияда ҳамюрти Марсело Брозович билан тандем ҳосил қилиши кутилмоқда. Жаҳон Чемпионатининг “Олтин тўп” соҳиби керак бўлганда ортдан туриб жамоасининг ўйинини назорат қилиши мумкин. Брозовичнинг борлиги ҳам унга анча далда бўлади.

Модричнинг борлиги сабаб Раджа Наингголан ўз эътиборини кўпроқ ҳужумга қаратади. Бу айни вақтда “Интер”даги оғриқли нуқталардан бири эди. Борха Валеронинг ёши ўтмоқда, Жоао Марио бу ёзда клубни тарк этиши ойдинлашмоқда. Шу сабабли “ниндзя” майдонда яратувчан фигурага айланиши кутилмоқда.

“ниндзя”нинг икки томонида Антонио Кандрева ва Мундиал юлдузи Перишичлар ўрин эгаллайди. Ўтган мавсумда ушбу жуфтлик биргаликда 17 голли узатмаларни амалга оширишган. Шунингдек, мос равишда Перишич 9 гол урган бўлса, Кандрева 8 голга муаллифлик қилган.

Ҳужумда клуб сардори Мауро Икарди ўрин олади. 25 ёшли аргентиналик ҳужумчи ўтган мавсумдаги 29 голлик статистикасини янада яхшилашга эришади.

2-вариант: ротация

4-3-3: Ди Женнаро; Дамброзио, Раноккья, Миранда, Димарко; Весино, Валеро, Гальярдини; Политано, Мартинес, Карамо

“Интер”нинг янги мавсумдаги бор эътибори асосан Чемпионлар Лигаси га қаратилса жабмас. Бироқ миллий кубок соврини ҳам бор. Жамоасини спорт формасини сақлаб қолиш мақсадида Спалетти вақти-вақти билан ротацияга қўл уришга мажбур бўлади.

Хандановичнинг ўринбосари сифатида мавсумолди тайёргарлик босқичида бир неча ўйин ўтказган Даниеле Паделли кўрилаётган эди. Бироқ 24 ёшли Раффаеле Ди Женнаро клуб келажаги сифатида Хандановичга ўринбосар бўлиши мумкин.

Унинг олдида эса тажрибали ва ёшлардан таркиб топган ҳимоя чизиғи ҳаракат қилади. Дамброзио, Миранда, Раноккья ва Далбертлар катта байрамларда ҳимоя мустаҳкамлигига жавобгар бўлишади. ўтган мавсумда Миранда Скриньярнинг асосий таркибдаги шериги эди. 33 дан ўтиб қолган бразилиялик ҳимоячи янги мавсумда ўз ўрнини Стефан Де Врейга ютқазиб қўйиши кутилмоқда. Унинг “Атлетико”да тўплаган тажрибаси ҳамон асқотиши мумкин.

Марказий ҳужумчиларнинг чегараланганлиги сабаб биз “Интер”нинг захира вариантини 4-3-3 ўйин тизимида кўрсак керак. Бундай схемада майдон марказини Весино, Валерова Гальярдини учлиги эгаллайди. Рақиб ҳимоясини эса Политано, Мартинес ва Карамолар ёриб киришга уриниб кўришади.

3-вариант: “аргентинча ҳужум”

4-2-2-2: Ҳанданович; Врсалько, Скриньяр, Де Врей, Асамоа; Брозович, Наингголан; Политано, Перишич; Икарди, Мартинес

Спалеттининг қўллаши мумкин бўлган яна бир ўйин тизими бу икки ҳужумчи билан ўйнаш варианти. Бунда Мауро Икарди ва Лаутаро Мартинеслар биргаликда рақиб дарвозаси олдида хавфли вазиятлар яратишга уриниб кўришади. Аргентиналик жуфтлик миллий терма жамоаларининг келажаги сифатида кўрилмоқда. Гарчи Икарди А Сериядаги 29 голлик натижаси билан терма жамоаси сафида Мундиалда иштирок этишга ҳақли эди. Бироқ майдондан ташқаридаги сабаблар туфайли у Жаҳон Чемпионатида иштирок этолмади. Мартинес эса ҳамюртидан кўп нарсаларни ўрганиши мумкин. Ўтган мавсумда Аргентина чемпионатида 13 гол урган ҳужумчи Италияда янада яхшилашга уриниб кўради. Қолган чизиқларда эса ўз амплуаларининг энг яхшилари ҳаракат қилади.

Эркинжон Ғайбуллаев тайёрлади.