Мирзаҳаким Тўхтамирзаевнинг Эктор Купер ва терма жамоа борасидаги фикрлари

SPORTS.uz сайти мухлисларга кутилмаган сюрпризлар тақдим этишда давом этади.

SPORTS.uz сайти ижодкорлари кўпчилик муҳлисларнинг талаб ва истакларига биноан “Youtube”даги саҳифамизда яна янги лойиҳани ҳавола қилади.

Эътиборли томони янги дастур кўпчилик соғинган таниқли шарҳловчи Мирзаҳаким Тўхтамирзаев билан биргаликда амалга оширилмоқда.

Қуйида ушбу дастурнинг видео ва текст шакли билан танишишингиз мумкин.

- Купер бошчилигидаги Ўзбекистон МТЖ ўйинида ўсиш кузатилди деган фикрга қўшиласизми?

- Эктор Купер тажрибали мураббий. Бунга шак-шубҳа бўлиши мумкин эмас. Мисрдек жамоани жаҳон чемпионатида бошқарди. Ўзбекистонга келиб, ўз билганича ўйинимизни шакллантиришга уринмоқда. Агар Эктор Купер раҳбарлигидаги Ўзбекистон миллий терма жамоаси аввалига Бирлашган Араб Амирликларидаги Осиё кубогида, кейинчалик жаҳон чемпионати саралашида иштирок этса ва Қатарда бўлиб ўтадиган мундиалга йўлланмани қўлга киритса, ҳамма каби биз ҳам беҳад қувонамиз. Лекин келинг, воқеаларга реал кўз билан боқишга ҳаракат қилиб кўрайлик. Октябрь ойида Эктор Купер бошқараётган терма жамоамиз, аввалига Шимолий Кореяни кейин эса Қатар терма жамоасини мағлубиятга учратди. Ҳар сафар вакилларимиз рақиблар дарқозасига жавобсиз иккитадан тўп йўллади. Мухлислар қалбида эртанги кунга умид уйғонди. Аммо биз октябрда Эрон ёки Жанубий Корея, Япония каби кучли жамоалар билан ўйнамаганимизни инобатга олиш мақсадга мувофиқ деб ўйлайман. Тасаввур қилинг, Шимолий Корея баҳордан бери терма жамоа лагерида тўпланмаган. Қатар эса Тошкентга ташриф буюришидан бир неча кун аввал мураккаб учрашувни уйда ўтказган ва Осиё чемпионлар лигасида иштирок этаётган ҳамда турли сабабларга кўра олтита футболчисини Доҳада қолдириб келган эди. Шу боисдан ҳам ҳозирча Эктор Купер ўзи таъкидлаганидек, Ўзбекистон терма жамоаси билан кутилган таркибни аниқлай олди ёки ўйинни йўлга қўя олдим демаяпти. Мана шу нарсага эътибор қаратайлик.

Яна бир тарафи. Ёдингизда бўлса, Миср терма жамоасини бошқарган Эктор Купер асосий эътиборини ҳимояга қаратган ҳамда ҳужум чизиғида мисрликлар жонига аксарият ҳолларда Муҳаммад Салоҳ оро кирганди. Хоҳлаймизми ёки йўқми, Ўзбекистон терма жамоаси таркибида Муҳаммад Салоҳга тенг келадиган футболчи йўқ. Марат Бикмаев, Иван Нагаев ва бошқаларни бирма-бир санаб ўтишимиз мумкин. Лекин уларнинг бирортаси терма жамоамизнинг кучли рақиблари ҳимояси олдига муаммоларни бисёр қилиб қалаштириб ташлашига ишониш қийин. Шу боисдан келинг аввал ноябрни кутайлик. Кейин бир ҳулосага келармиз. Нима бўлганда ҳам Ўзбекистон терма жамоаси ғалаба қозонсин. Сиз ва биз футбол учрашувларини соғиниб юрайлик.