Pepsi Суперлига 19-тури доирасида Наманганнинг “Навбаҳор” клуби ўз майдонида Тошкентнинг “Пахтакор” жамоасини қабул қилади. Мазкур ўйин учун чиқарилган чипталар эртадан сотувга чиқади. Бу ҳақда клуб матбуот хизмати хабар бермоқда.  

“Навбаҳор” ПФК раҳбарияти томонидан ушбу ўйиндан бошлаб, “Марказий” ўйингоҳга кириш чипталари арзонлаштирилиб, 30 минг сўмлик чипта нархлари 20 минг сўмга туширилди. Энди севимли жамоамиз ишқибозлари 4,5, 6, 7, 8,9, 14, 15, 16, 17, 18 ва 19-секторлар учун 15 минг, 2,3, 10, 11, 12, 13, 20 ҳамда 21-секторлар учун 20 минг сўмдан чипта харид қилишлари мумкин.

Бундан ташқари, “Навбаҳор” – “Пахтакор” учрашуви учун чиқарилган ҳар бир чипта ютуқли ҳисобланиб, мухлислар харид қилган чипталарига 2 дона “Смартфон” телефонлари, “Навбаҳор” клуби бренди остидаги футболкалар, соябонлар ва “Навбаҳор” жамоаси футболчиларининг имзолари туширилган тўплар ютиб олиш имкониятини қўлга киритишади.

Демак, ишқибозлар харид қилган чипталарига севимли жамоалари иштирокидаги ўйинни томоша қилишдан ташқари, ўз уйларига совғалар билан қайтиш имкониятига ҳам эга бўлишади.

Бундан ташқари, “Навбаҳор” – “Пахтакор” учрашувидан олдин Наманган вилоятининг таниқли хонандалари томошабинларга ўзларининг дилрабо куй-қўшиқлари билан завқ улашишади. Мазкур ўйинни яқиндагина якунланган ЖЧ-2018 турнирида фаолият юритган қитъамизнинг етакчи рефериларидан бири, баҳрайнлик Наваф Шукрулла бошчилигидаги ҳакамлар бригадаси бошқаради.

“Навбаҳор” – “Пахтакор” учрашуви 28 июль куни соат 20:00да старт олади.

Матнда хатолик топсангиз, ўша хатони белгилаб, бизга жўнатинг (Ctrl + Enter)