Вальверде: Мессининг соғлиғи билан таваккал қилишни истамадик

“Барселона” жамоаси бош мураббийи Эрнесто Вальверде “Интер”га қарши (1:1) ЕЧЛ 4-тур ўйинидан сўнг матбуот анжуманида иштирок этиб, ўз фикрлари билан ўртоқлашди.

“Гуруҳ учрашувлари якунланмасидан ЕЧЛ плей-офф босқичига чиққанимиздан мамнунман. Мессининг ўйин қайдномасига киритилмаслигининг сабаби шундаки, унинг соғлиғи билан таваккал қилишни истамадик.

Машғулотларда ўзини эҳтиёт қилиш мумкин, аммо ўйин вақтида ҳар нарса содир бўлиши мумкин. Айниқса бу каби ўйинларда кутилмаган тўқнашув ва йиқилишлар кўп бўлади. Лео билан гаплашиб олгандик – бу машғулот эмас”, – деди Вальверде.  

Эслатиб ўтамиз, мазкур учрашувдан кейин “Барселона” муддатидан аввал ЕЧЛ плей-офф босқичига чиқди ва жорий мавсумда ушбу натижани қайд этган илк клуб бўлди.