Аббос Европага кетмаслиги керак! Етти экспертнинг Файзуллаев ҳақидаги фикрлари

Россия футбол жамоатчилиги вакиллари ЦСКАдаги фаолиятини муваффақиятли бошлаган Аббосбек Файзуллаевнинг ўйинларига баҳо бермоқда.

20 ёшли футболчимиз жамоасининг сентябрь ва октябрь ойларидаги энг яхши футболчиси бўлди. Аввал Россия Премьер-лигасида ўйнаган футболчиларимиз бундай натижа қайд этмаганини таъкидлаш лозим.

Sports.uz портали россиялик футбол мутахассисларининг Аббосбек Файзуллаев ҳақидаги фикр-мулоҳазаларини ўзбекистонлик мухлислар эътиборига ҳавола қилади.

Игорь Семшов, “Чайка” жамоаси бош мураббийи:

Файзуллаев ўзини яхши томондан кўрсатмоқда, мураббий унга ишонч билдиряпти. Аббосбек майдондалигида ҳар бир вазиятдан максимум фойда чиқаришга уриняпти. У ёш ва келажаги бор ўйинчи. Энг муҳими, уни янада ўсиш мақсади бор. Файзуллаев ЦСКАни кучайтирди.

Марат Хинчагов, Ultimate Sports агентлиги раҳбари, футбол агенти:

Трансфер бозорида фавқулодда муваффақиятли танловлар ҳам бўлиб туриши, одамни қувонтиради. Масалан, Аббосбек Файзуллаев. ЦСКА селекция бўлими жуда зўр трансферни амалга оширган бўлиб чиқди. Аввалига бу трансфер кўпчиликни иккилантирганди.

Биз ҳам бу футболчини кузатиб келаётган эдик ва энди Файуллаев маҳоратини Россияда оширишидан хурсандмиз.

Олег Фоменко, ЦСКА мураббийи:

Аббосбек Файзуллаев жуда яхши футболчи. У жуда катта ҳажмдаги ишларни бажармоқда ва жамоага кўп фойда келтиряпти. Файзуллаев ажойиб йигит, у футболчи сифатида тез ўсяпти. Худо берган иқтидори бор ва у буни ривожлантиряпти.

Валерий Кечинов, “Пахтакор” ва “Спартак” собиқ футболчиси:

Менга Аббосбек Файзуллаев каби енгил, тезкор, техникаси кучли ва ақлли футболчилар жуда ёқади.

Владимир Пономарев, ЦСКАнинг собиқ ўйинчиси:

ЦСКАда пайдо бўлган Файзуллаев ўйиндан ўйинга ўсиб боряпти ва ҳар бир учрашувда рақиб дарвозаси олдида хавфли вазиятларни яратмоқда. Ўйлашимча, келаси ёзда Аббосбек Европага кетмайди. Чунки у ҳали янада кўпроқ тажриба тўплаши ва ўз устида ишлашда давом эттириши керак. У ҳали ЦСКАга кўп фойда келтиришига умид қиламан.

Игорь Корнеев, ЦСКАнинг собиқ ўйинчиси:

Файзуллаев жисмонан бақувват бўлмаса-да, мураккаб вазиятлардан тезкор ҳаракатлари ва енгил дриблинглари билан  чиқиб кета олади.

Юрий Белоус, футбол эксперти:

Файзуллаев учрашувларнинг энг яхши ўйинчиси сифатида эътироф этилаётганидан умуман ҳайратга тушмадим. Аббос майдондаги энг муҳим фигуралардан бирига айланган. У ақлли, тезкор, чаққон ўйинчи ва катта ҳажмдаги ишларни бажармоқда. ЦСКАга тез сингиб кетганидан хурсандман.

Давила: Файзуллаев бу кетишда Алексис Санчесдан ўтади!

Шомуродов энг охирида, Ҳусанов эса йўқ!

Ўзбек футболчиси “Олтин тўп” масаласида Мессига мурожаат қилди (фото)

Файзуллаев ўзбек футболининг кучли жиҳатини айтди

Футболчиларимизни “Бавария” скаутлари кузатди...

Файзуллаев: Бошида мени ортга қайтариб юбормоқчи бўлишган эди...

Файзуллаевни эмас, Мессини мақтанг!