Абдел-Азиз: "Улар, албатта, жанг қилишлари керак"

Мисрлик ММА жангчиларининг машҳур менежери ва Dominance ММА Management раҳбари Али Абдел-Азиз енгил вазнда UFC чемпиони россиялик Ислом Махачев(25-1) ва америкалик Жастин Гэтжи(25-4) ўртасида жанг ташкил этиш зарур деб ҳисобламоқда.

“Махачев ва Гэтжи жанги бўлиши керак. Жастин, бу жангдан кейин ҳеч қачон аввалгидек бўлмайсан, буни унутма”, — деб ёзди Абдел-Азиз ижтимоий тармоқларда. Аввалроқ, Махачевнинг ўзи Гэтжи билан бўлиши мумкин бўлган жангдан манфаатдор эканини айтганди.

Эслатиб ўтамиз, 21 октабрь куни Абу-Дабида (БАА) "UFC 294" турнири доирасида бўлиб ўтган сўнгги жангида Махачев австралиялик Александр Волкановски билан учрашган ва реванш жангида Ислом биринчи раундда ғалаба қозонган эди.