Агар шу иш амалга ошса, “Барса” ва “Реал”га бир миллиард евродан пул берилади

Янги Европа Суперлигасини ташкил этишга уринаётган A22 Sports Management компанияси раҳбарияти агар “Барселона” ва “Реал” бу мусобақа қўшилишса, уларга бир миллиард евродан маблағ берилишини таъкидлади.

Бу ҳақда Mundo Deportivo нашри хабар берди.

Унга кўра, янги Суперлиганинг умумий бюджети 15 миллиард еврони ташкил қилади ва лига хўжайинлари испан грандларига катта миқдорда пул тўлашга тайёр.

Чунки Каталония ва Мадрид клублари янги Суперлигани ташкил этиш ғояси туғилганидан бери уни қўллаб-қувватлаб келмоқда.

Мутахассислар агар “Барселона” бир миллиард еврони қўлга киритадиган бўлса, бир неча йилдан бери давом этиб келаётган молиявий муаммоларнинг барчасини бартараф этиш имкониятига эга бўлишини таъкидлаяпти.

ФИФА ва УЕФА ташкилотлари Европа Суперлигасини ташкил этилишига қарши чиқмоқда. Янги турнир ташкилотчилари ҳар икки халқаро федерацияни судга берган. 21 декабрь куни Европа Иттифоқи суди бу масалани кўриб чиқади. Ушбу суд қарори Европа Суперлигасининг келажагини ҳал қилади.