"Ал-Веҳдат" бош мураббийи: "Насаф"нинг ўйин услуби Европа футболига яқин"

Хабарингиз бор, "Насаф" эртага Осиё чемпионлар лигаси гуруҳ босқичи 2-турида "Ал-Веҳдат"га қарши майдонга тушади. Иордания клуби бош мураббийи Райед Ассаф ва футболчи Аҳмад Элиас бугун ўйин олдидан ўтказилган матбуот анжуманида иштирок этди.

Мураббий: - Бу "Насаф" билан ўзаро иккинчи ўйинимиз. Биз учун жуда муҳим баҳс. Биз бу учрашувга етарлича тайёргарлик кўрдик. 

Футболчи: - Авваламбор, илк ўйинда бизни қўллаб-қувватлаб турган мухлисларимизга миннатдорчилик билдираман. Улар бизга катта ёрдам берди. Дастлабки баҳс натижаси улар ёрдамида қўлга киритилди.

Мураббий: - Гуруҳдаги икки ўйин ҳам дуранг билан тугади. Бу барча жамоаларда имконият борлигини англатади. Биринчи баҳс доим қийин бўлади. Бу барча учун бир ҳил қоида. Мухлисларимиз ёрдами билан яхши ўйин кўрсатдик. 3 очко олишимиз мумкин эди. Бироқ 1 очко ҳам ёмон эмас. 

"Насаф" - жуда яхши ўйин ташкил этадиган жамоа. Уларнинг услуби Европа футболига яқин. Олдинда бизни қийин учрашув кутмоқда.

Биз биламизки, "Насаф" футболчилари ўтган йили ОФК кубогида қатнашган. Футболчилар бир-бирини яхши тушунади. Биз рақиб ўйинини таҳлил қилиб чиқдик. Эртанги ўйинда майдонда боримизни берамиз.