Александр Волкановски - Яир Родригес ким ғалаба қозонади? (Сўровнома)

9 июль куни тонгда “UFC 290” турнири старт олади. Ушбу жанг кечасининг марказий жанги ярим енгил вазн (65,8 кг) тоифасида амалдаги чемпион Александр Волкановски ва даъвогар Яир Родригес ўртасида бўлади. Биз ҳар доимгидек, ушбу қарама-қаршилик борасида ўзбек ММА олами вакилларининг фикри билан қизиқдик.

Нозимжон Тўйчиев – Ўзбекистон ММА ассоциацияси Андижон вилояти бўлими раҳбари

- Менимча бу жангда яққол фаворит Александр Волкановски деб ўйлайман. Жанг муддатидан аввал якунланади. Катта устунлик билан Алекс ғалаба қозонади. Имкониятларни 70/30 деган бўлардим.

Машрабжон Рўзибоев – ММА жангчиси

- Менимча бу жангда Александр Волкановски ғалаба қозонади. У рақибига нисбатан мукаммалроқ жангчи, деб ҳисоблайман. Родригес ҳам ёмон эмас, бироқ Волкановски ҳозирги кунда юқори жимоний ҳолатга эга, деб ўйлайман. Унинг Ислом Махачевга қарши жанги ҳам бунга мисол бўла олади. У Исломни ҳам қийнаб қўйди. Родригес устидан қийинчиликсиз ғалаба қозонса керак.

Достон Бозоров –ММА жангчиси

- Яир Родригес ҳам жуда яхши жангчи. Бироқ, Александр Волкановски бу дивизионда яққол етакчи, десам адашмаган бўламан. Назаримда бу жангда ҳам Александр Волкановски ғалаба қозониб, чемпионлик камарини ҳимоя қилади.

Рамазон Темиров – ММА жангчиси

- Ярим енгил вазн тоифасининг икки номдор жангчилари бизга қизиқарли жангни тақдим этади, деб ўйлайман. Яир Родригес ҳам яхши даражада, бироқ Алекс Волкановски барибир яхшироқ ва у жангда ғалаба қозонади, деган фикрдаман.

Фирдавс Ҳасанов – ММА жангчиси

- Алекс Волкановски жуда кучли жангчи. Лекин Родригесни ҳам ўзига хос услуби бор. Мени фикрим 60/40 Волкановски фойдасига!

Дониёрбек Рўзиев – мураббий

- Қизиқарли жанг бўлади. Родригес ҳам сўнги жангларида яхши ҳаракат қиляпти. Аммо Волкановски бу бошқа классдаги жангчи саналади. Назаримда Алекс имконият қолдирмаган ҳолда, ғалаба қозонади. 

Умиджон Нуров – мураббий

- Менинг тахминим бўйича Александр Волкановски ғалаба қозонади. Шунингдек, ушбу турнирдан ўрин олган жангларда Роберт Умттакер ва Брендон Морено ҳам навбатдаги ғалабасига эришади.

Ўғилой Насимова – ММА жангчиси

- Алекс Волкановскини жангларини ҳам Яир Родригесни ҳам доим кузатиб бораман. Алекс жуда тажрибали ва ақилли жанг олиб боради. Жисмоний жиҳатдан ҳар доим яхши “форма”да бўлади. Яирни эса оёқ зарбалари кучли ва тез, иккиси ўртасида анча қизиқарли жангни ва шоуни ҳам кўрамиз. Менимча Алекс ғалаба қозонса керак.