Америкалик гросмейстер Ўзбекистонга мурожаат қилди

Америкалик гроссмейстер Ханс Ниманн Тошкентда ўтган UzChess Cup Masters мусобақасидаги иштироки ҳақида фикр билдирди. 

Жаҳоннинг энг кучли шахматчилари қаторида қайд этиладиган Ниманн мусобақани еттинчи ўрин билан якунлади. У 9 имкониятдан 4 очко тўплади. Турнир якунланганидан сўнг гроссмейстер ижтимоий тармоқларда махсус хабар қолдириб, Ўзбекистонда кўрсатилган самимий меҳмондўстлик учун миннатдорлик изҳор этди.

- Тошкентдаги турнир мен хоҳлаганимдек кечмаган бўлса-да, лекин сафарни аэропортда тайёрланган классик ўзбек палови билан якунладим. Ўзбекистоннинг шахматга бўлган муҳаббати ва энергияси руҳлантиради. Самарқандда бўлиб ўтадиган Олимпиадага қайтишни орзиқиб кутяпман!, — деб ёзди Ханс Ниманн.

UzChess Cup Masters ғолиблиги 19 ёшли ўзбек шахматчиси Муҳиддин Мадаминовга насиб этди. У драматик тай-брейкда ўз ватандоши Шамсиддин Воҳидовни мағлуб этди. Классик дастлабки босқичда ҳар икки шахматчи ҳам 5,5 очкодан жамғарган эди.

Маълумот учун, Ханс Ниманн FIDEнинг жаҳон рейтингида классик йўналиш бўйича 2742 рейтинг билан 12-ўринни эгаллаб турибди. У 2022 йилда Магнус Карлсен билан юз берган можароли дуэлдан сўнг бутун дунёга танилди ва ҳозирда сайёранинг энг кўзга кўринган шахматчилари қаторида ҳисобланади.