Анчелотти: “Рақиб ким бўлишидан қатъи назар, Чемпионлар лигасидаги йўлимизни давом эттирмоқчимиз”

"Реал Мадрид" бош мураббийи Карло Анчелотти "Атлетико"га қарши жавоб беллашувидан аввал матбуот анжуманида иштирок этди. Мутахассис бўлажак учрашув, бир неча футболчиларнинг ҳолати ва Диего Симеоне ҳақида гапирди. 
 
“Биз ҳозирги кунда яхши ишлаяпмиз, мотивациямиз бор. Бу қийин ўйин бўлади, аммо биз Чемпионлар лигаси йўлини давом эттиришимизга ишончимиз комил. Бу биз учун алоҳида турнир. 
 
Браим ёки Модрич? Таркибда 11 нафардан ортиқ ўйинчи бор ва ўйнамаётганлар ҳам албатта ўз ҳиссасини қўшадилар, яхши амалга оширилган алмаштириш ўйинда ўзгариш қилиши мумкин. 


 
Рақибимиз ким бўлишидан қатъи назар, чорак финалга чиқишни истаймиз. Пенальтилар серияси? Буни машқ қилиш осон эмас, чунки сиз ўйиндаги атмосферани ва психологик босимни такрорлашингиз керак, бу машғулотларда мумкин эмас. Айни дамда, бу ҳақда ўйлаётганимиз йўқ. 
 
Эртага нима муҳимроқ – югуришми ёки ўзгаришми? Агар кўп югурсанг, ҳисобни тенглаштиришинг мумкин, агар яхши ўйнасанг, ўйинда ғалаба қозонишинг мумкин. 
 
Ўйинчилар ғалаба учун масъулдирлар ва мағлубиятлар учун ҳам (кулади). 


 
Биз тўп билан ва тўпсиз нима қилишимизга эътибор қаратишимиз керак. Мотивация ва босим жуда юқори бўлади. Ўйинчилар техник ва тактик жиҳатларга эътибор қаратишлари керак. Қолганлари уларга боғлиқ. 
 
Диего Симеоне? Менимча, у ажойиб мураббий. Футбол ҳақидаги фикрларимиз жуда ўхшаш. 
 
Эсимда бўлишича, “Атлетико”га қарши барча ўйинларимиз кескин ва рақобатли кечган. Эртага ҳам шундай бўлади, ҳаммасини майда деталлар ҳал қилади” – деди италиялик мутахассис.