"Андижон" - "Машъал" ўйинини бир эмас, иккита шарҳловчи шарҳлайди, чунки...

28 октябрь куни про лиганинг 24-турида “Андижон” ўз майдонида Муборакнинг “Машъал” клубини қабул қилишидан хабарингиз бор.

Ўйиннинг аҳамияти айниқса, мезбонлар учун жуда муҳим. Боиси, Суперлига масаласини ҳал қилган “Бургутлар” ғалаба қозонадиган бўлса, 1-ўринни ҳам муддатидан олдин ҳал қилиб қўяди ва “Про лига-2022” ғолибига айланади.

“Андижон” клуби матбуот хизматининг хабарига қараганда, мусобақа ғолиблиги учун курашаётган мазкур жамоа иштирокидаги учрашувни яна тандем кўринишида шарҳлаб борадилар. Бу сафарги жуфтлик – Даврон Файзиев ҳамда Бобур Акмалов. Беллашув "FutbolTV" телеканали орқали тўғридан-тўғри эфирга узатилади.

Умуман олганда, иккала жамоалар ўртасидаги ўйинлар ҳамма вақт қизиқарли тус олган. Шу сабабли томонларнинг ўзаро учрашувларида ҳам натижалар ҳар хил.

Демак, клублар ҳозирга қадар 37 марта тўқнаш келишган. Статистик рақамлар шуни кўрсатяптики, “Андижон”да 13 та, “Машъал”да эса 18 та ғалаба бор. Шунингдек, 6 та учрашувда дуранг қайд этилган. Лекин охирги икки йилда “Андижон” рақибига ютқазмаяпти. Масалан, ўтган йили Андижонда дуранг, Муборакда эса уч очко қўлга киритилган. Бу йил эса шу пайтгача уч марта тўқнаш келишди ва уларнинг иккитасида жамоамиз ғалаба қозонди, яна бир учрашув дуранг билан якун топди.