Ўзбекистон билан ўйиндаги гапи учун Роналдунинг "пўстагини қоқишди"

Португалиялик футбол агенти Паулу Барбоза журналистларга берган интервьюсида жаҳон чемпионатининг гуруҳ босқич иккинчи тури доирасида ўтказилган Португалия ва Ўзбекистон миллий терма жамоалари ўйинидан кейин Криштиану Роналду ҳақида қаттиқ гапирди. Бу экспертнинг таъкидлашича, бугунги кунда 41 ёшли тўпурарни "Олтин тўп" учун асосий даъвогарлар қаторига қўшиб бўлмайди. 

Таъкидлаш лозимки,  Роналду Ўзбекистон билан бўлган ўйинда иккита тўп киритиб европаликларнинг 5:0 ҳисобидаги ғалабасига катта ҳисса қўшиш баробарида Португалия терма жамоаси сафида жаҳон ва Европа чемпионатларидаги 10 ўйиндан иборат голсиз сериясига ҳам чек қўйди.

Sports.uz портали Паулу Барбозанинг интервьюсини ўқувчилар эътиборига ҳавола этишни маъқул топди. 

— Криштиану Ўзбекистонга қарши ўйиндан сўнг: "Мен қайтдим!" деди. Бу нимани англатади?

— Ўзбекистонга қарши ўйинда қайтдими? Ҳм... Унда у олдин қаерда эди? Илгариги 10 ўйинда-чи? Мен ҳозир айнан биз учун жуда муҳим бўлган жаҳон ва Европа чемпионатлари беллашувларини назарда тутяпман. 

Ўшанда Криштиану терма жамоага голлари билан жиддий ёрдам бера олмади. Масалан, у 2022 йилги жаҳон чемпионатининг чорак финалида Марокаш дарвозасини ишғол этолмади, "Евро-2024" чорак финалида Франция дарвозасига ҳам йўл топа олмади. 

Энди эса Ўзбекистонга қарши ўйинда қайтган бўлиб чиқяпти. Яхши, майли... Мен ҳеч кимга ёмон кўз билан қараётганим йўқ. Унинг учун хурсандман. Лекин биз олдинги йирик турнирларни ҳам эсдан чиқармаслигимиз керак. Энди Колумбияга қарши ўйинни кутиб қоламиз.

— Роналду учун бу жаҳон чемпионатида Лионель Мессига қараганда кўпроқ гол уриши қанчалик муҳим? Месси аллақачон беш марта тўп киритди. 

— Криштианунинг шахсий амбициялари ҳақида ҳамма яхши билади. Лекин, масалан, бизда Эйсебио бўлган — у фақат битта жаҳон чемпионатида ўйнаб, 1966 йилда 9 та гол урган! Кеча Роналду уни ортда қолдирди, энди унинг ҳисобида 10 та гол бор. Лекин, бир дақиқа, бу кўрсаткичга у олтита турнир давомида эришди. Ҳамма нарса таққослаганда аниқ кўринади.

— Жаҳон чемпионатида икки тур ўтгач, сиз учун "Олтин тўп"нинг асосий даъвогарлари кимлар?— Албатта, Килиан Мбаппе, Лионель Месси. Яна ким? Ҳарри Кейн — Ганага қарши ўйинда пенальтини уришни уддаламаган бўлса-да, шу рўйхатда бор. Шунингдек, Ламин Ямал. Ҳозирча шулар. Неймар майдонга тушса, ана ўшанда унинг ҳозирги даражасини баҳолай оламиз.

— Роналду сизнинг рўйхатингизда, тамоман, бўлиши мумкин эмасми?

— Ушбу соврин учун у жиддий даъвогар бўла олади, деб ўйламайман. Албатта, футболда ҳамма нарса бўлиши мумкин. Лекин, афсуски, бизнинг гуруҳда эндиликда Ўзбекистон даражасидаги рақиблар қолмайди. Ачинарли ҳолат... Энди Роналду кейинги ўйинларда ҳам гол урадими-йўқми — бу катта савол остида.

Ҳозирча Португалия 4 очко билан «K» гуруҳида иккинчи ўринни эгаллаб турибди. Ўзбекистон эса бирорта очко тўплай олмаган ҳолда тўртинчи, сўнгги поғонада бормоқда. Гуруҳ босқичининг сўнгги турида португалияликлар Колумбияга қарши майдонга тушади, Ўзбекистон терма жамоаси эса ДР Конго билан куч синашади.

Европалик агент Ҳусановга қўшиб, Файзуллаев номини ҳам ёзиб олди

Ўзбек футболчисининг кейинги манзили "Челси" ёки Франция бўлади!

Ўзбеклар билан "ҳаёт учун ўйин" бўлади! Конго бош мураббийи Ўзбекистоннинг кучли томонини айтди

Суперклуб Шомуродов учун учта юлдузини ва пул таклиф қилди!