Англия энг қудратли уч клуби мундиал кашфиёти билан музокара бошлади

«Манчестер Сити», «Ливерпуль» ва «Арсенал» мутасаддилари  «Лилль» тарбияланувчиси Айюб Буаддини ўз сафига қўшиб олиш бўйича музокараларни бошлади. 

Бу ҳақда Football Insider нашри хабар берди. Манбага кўра, Англия премьер-лигаси клубларининг қизиқиши 18 ёшли футболчининг Марокаш терма жамоаси таркибида 2026 йилги жаҳон чемпионатида кўрсатган ўйинларидан сўнг кескин ошган.

Маълумотларга қараганда, «Лилль» раҳбарияти ўз иқтидорли футболчисини сотишга тайёр, аммо фақат молиявий жиҳатдан йирик таклиф келиб тушган тақдирда. Шу билан бирга, эҳтимолий харидорлар турли сценарийларни кўриб чиқмоқда: жумладан, Буаддини сотиб олиб, уни яна бир мавсумга «Лилль» таркибида ижара асосида қолдириш варианти ҳам муҳокама қилинмоқда. 

Бу орқали ёш ярим ҳимоячига Франция чемпионатида яна тажриба тўплаш имкони яратилиши мумкин.

Айюб Буадди 2025/2026 йилги мавсумда барча мусобақалар ҳисобга олинган ҳолда 42 та ўйинда майдонга тушди ва бир бор голли узатма муаллифига айланди.