Англияда пенальтилар рекорди такрорланди

Англия Премьер-лигасининг 17-туридаги охирги учрашувда “Фулхэм” футболчилари “Ноттингем Форест”ни 1:0 ҳисобида мағлубиятга учратди.

Мезбон жамоага ғалаба келтирган ягона голни биринчи бўлим якунланиши арафасида Рауль Хименем пенальтидан киритди.  Шу тариқа, мексикалик футболчи Англия Премьер-лигасида ўзи ижро этган 11 та пенальтининг барини дарвоза тўрига аниқ жойлади. Бу рекорд кўрсаткичнинг такрорланиши сифатида қайд этилди.

 Статистикага ихтисослашган Opta тадқиқотлар маркази ўзининг ижтимоий тармоқдаги саҳифасида тарқатган маълумотга кўра, ҳозиргача сақланиб турган рекорд “Манчестер Сити”нинг собиқ футболчиси Яя Турега тегишли бўлиб, бу ярим ҳимоячи ҳам қаторасига 11 марта 11 метрлик белгидан тўп кирита олган.

Энди Рауль Хименес чемпионат давомида яна бир бор пенальтидан самарали фойдалана олса мутлақ рекордчига айланади.

34 ёшли Рауль Химанас Мексиканинг “Америка” клуби тарбияланувчиси ҳисобланади. Европадаги фаолиятини 2014 йили Испаниянинг “Атлетико” жамоаси бошлаб, кейинчалик Португалиянинг “Порту” ва Англиянинг “Вулверхэмптон” клубларида ҳам тўп тепган.

Тажрибали ҳужумчи “Фулэм”да 2023 йилнинг ёзидан бери ўйнаяпти. Жорий мавсумда тажрибали форвард барча мусобақаларда 20 та учрашув ўтказиб, тўртта гол урди ҳамда икки марта голли узатма берди. Унинг амалдаги шартномаси шу мавсум охирида якунланади.