АПЛ. Бизни бу турда қандай баҳслар кутиб турибди?

 Эртага Англия Премьер-лигасининг 27-тур баҳсларига старт берилади.

21 февраль

Англия Премьер-лигасининг 27-тур ўйинлари ҳам бизга қизиқарли ўйинларни тақдим этиши табиий. Ушбу турни очиб берадиган ўйин "Вилла парк" стадионида бўлиб ўтади. Майдон эгаси "Астон Вилла" клуби жадвалнинг 15-поғонасини банд этиб турган "Лидс"га қарши баҳс олиб боради. Бу ўйин билан параллел тарзда "Брентфорд" - "Брайтон" ҳамда "Челси" - "Бёрнли" учрашувларига ҳам старт берилади. Бундан ташқари,  "Вест Хэм" ўз уйида "Борнмут"га қарши майдонга чиқади. Абдуқодир Ҳусанов тўп тепаётган "Манчестер Сити" куннинг марказий ўйинида "Ньюкасл" билан куч синашади. Куннинг сўнгги ўйини ва биз учун муҳим баҳс тунги соат 01:00да бошланади.

22 февраль

Иккинчи кунги баҳсларни "Ноттингем Форест" - "Ливерпуль" учрашуви бошлаб беради. Ўтган турда "Арсенал"нинг қўрқинчли тушига айланган, бироқ айни вақтда аутсайдер мақомида бўлиб турган "Вулверхэмптон" клуби сафарда "Кристал Пэлас" меҳмони бўлади. Чемпионат стартини жуда ишончли бошлаган, аммо кейинчалик сустлашиб қолган "Сандерланд" ўз майдонида "Фулхэм" билан баҳс олиб боради. Турнинг марказий ўйини эса Лондонда бўлиб ўтади. "Тоттенхэм" - "Арсенал" ўйини ҳар қачон ҳам қизиқарли ва жанговар рухда ўтади. Бу сафар ҳам бири чемпионлик курашида қатнашаётган бўлса, яна бири ҳеч бўлмаганда Еврокубоклар йўлланмасини қўлга киритишга ҳаракат қилмоқда. Турни якунлаб берадиган ўйинда "Эвертон" жамоаси сўнгги 5та учрашувнинг 4тасида ғалаба ва биттасида дуранг қайд этиб, аввалги шон-шуҳратини тиклашга интилаётган "Манчестер Юнайтед"га қарши майдонга тушади.

Айни вақтда "Арсенал" Англия Премьер-лигасида 58 очко билан етакчилик қилмоқда.