Шомуродовдан учта гол ўтказган машҳур дарвозабон мундиалдан кейин футболдан кетади
Мексика миллий терма жамоасининг афсонавий дарвозабони Гильермо Очоа 2026 йилги жаҳон чемпионатидан кейин миллий жамоадаги фаолиятини якунлашини тасдиқлади.
Гильермо Очоа замонавий футбол афсоналари – Лионель Месси ва Криштиану Роналду қаторида олтинчи маротаба жаҳон чемпионатида иштирок этмоқда. Илгари ҳеч бир футболчи бу кўрсаткичга эриша олмаган.
Очоа бутун фаолияти давомида Мексика терма жамоаси сафида 153 та ўйин ўтказган, шулардан 63 тасида ўз дарвозасидан гол ўтказмаган.
- Миллий жамоага келсак, бу 100 фоиз аниқ. Ҳозир тўхташ учун энг муносиб вақт, чунки менинг номим аллақачон Лионель Месси ва Криштиану Роналду каби буюк футболчилар рўйхати билан бирга турибди.
Клуб футболига келсак, бу ҳақда ўйлашим керак. Буни ҳеч ким билмайди, чунки бу телевидениеда кўрсатилмайди, аммо сўнгги уч-тўрт йил давомида ушбу жаҳон чемпионатида иштирок этиш учун кўп нарсадан воз кечдим.
Италияда, Португалияда ва Кипрда бутунлай ёлғиз эдим. Менга ҳам, Мадридда қолган оиламга ҳам қийин бўлди.
Футболда шунча йил ўтказганимдан кейин фикрларимни жойига қўйиш учун икки-уч йил керак бўлади.
Футбол шундай. Қатардан кейин спортдан кетишга тайёрлана бошладим, шунинг учун бу мен учун кутилмаган ҳолат бўлмайди. Бу осон бўлмайди, лекин мен ўзимни яхши биламан ва ҳеч ким мени ишлашга мажбур қила олмайди. Менда бундай эркинлик бор, аммо барибир умр бўйи футбол ўйнай олмаслигим ачинарли, - деди Очоа L'Équipe нашрига берган интервьюсида.
Гильермо Очоа Мексиканинг “Америка” клуби тарбияланувчиси ҳисобланади. Фаолияти давомида легионер сифатида Франциянинг “Аяччо”, Испаниянинг “Малага” ва “Гранада”, Бельгиянинг “Стандард”, Италиянинг “Салернитана”, Португалиянинг АВС ва Кипрнинг “АЕЛ Лимасол” жамоаларида ўйнаган.
Ўзбекистон миллий терма жамоаси ҳужумчиси Элдор Шомуродов А Серияда фаолият юритган даврда Италия чемпионати доирасидаги ўйинларда Гильермо Очоа дарвозини уч маротаба ишғол қилган эди.
Фикрлар