"Арсенал" сўраган легионеримизни жамоаси Англияга қўйиб юбормаган экан...

Ўзбек футболининг охирги йиллардаги энг ёрқин юлдузларидан бири Одил Аҳмедов https://sport24.ru сайти журналисти Владислав Шапирога интервью берди.

Аҳмедов интервьюси давомида футболчилик фаолияти ҳақидаги саволларга ҳам жавоб берди.

- Ўн йил муқаддам юлдузли таркибга эга “Анжи”га қўшилгандингиз. У ердагилардан кимни алоҳида тилга оласиз?

- Ўша жамоадаги жаҳон миқёсидаги юлдузларнинг ҳаммаси билан ажойиб муносабатга эга эдик. Лекин мен учун энг яхшиси, шубҳасиз, Это’О бўлган. Айнан у туфайли ўша юлдуз жамоа ва ажойиб муҳит юзага келган.

У менга ҳар доим “Барселона”да ўйнаган даврини, жамоа қандай қилиб Ла Лига ва Чемпионлар лигасида ғолиб чиққанини гапириб берарди. Энг муҳим – футболчининг менталитети, деб таъкидларди. Мана шуни “Анжи”нинг ҳар бир футболчисига сингдиришга ҳаракат қиларди.

- Роберто Карлоснинг роли камроқ эдими?

- “Анжи”га ўтган вақтида у ҳамма билган “Реал”даги ўйнаган даври каби юқори даражадаги футболчи эмасди.  Менимча, Роберто Карлосни Маҳачқалъага фақат пиар учун таклиф қилишган эди. Келиб  бир-бир ярим йил ўйнади, кейин бош мураббий ёрдамчиси бўлди. “Анжи”даги аҳамияти бўйича уни Это’Ога тенглаштириб бўлмайди.

- Керимов Это’Ога “Бугатти” ҳадя қилгани ростми?

- Ҳа. Ўйлашимча, янги “Бугатти” унинг шартномасида кўрсатилган.

- Игорь Денисов билан шов-шув бўлган можаро нимадан келиб чиққан?

- Бу можаро Игорнинг қоратанли футболчилар ҳақида ёқимсиз нарсаларни кўп гапирганидан кейин келиб чиққан. Шу сабабли улар қаттиқ тортишиб қолишган ва муштлашиб кетишларига оз қолган.

Умуман олганда, Это’О жамоадошларига босим қилмасди, жанжалкаш эмасди. Зиммасига кўп нарса оларди, лекин буни профессионалларча қиларди. Мураббийларга ҳеч қачон ақл ўргатмаган. Самуэль “Анжи”нинг сардори ва лидери эди, ўзи ҳам кўп тер тўкарди, бошқалардан ҳам бор имкониятини сарфлашни талаб қиларди.

- “Анжи”да Кокорин билан ўйнашга улгурганмисиз? У ўша жамоада умуман кам вақт бўлган.

- Жамоа Кокорин келганидан бир ҳафтадан кейин барбод бўлганди. Ҳатто, у бирорта машғулотда қатнашганини эслай олмайман. “Анжи”га қанчалар тез ўтган бўлса, Москвага ҳам шундай қайтди.

Кокоринни “Динамо” сафида биринчи марта кўрганимда Европанинг яхшироқ грандларида ўйнай олишига амин эдим. Жуда истеъдодли ўйинчи. Афсуски, характери ва интизомсизлиги панд берди.

- Сиз ҳам Англия премьер-лигасига штишингиз мумкин эди. Нега трансфер барбод бўлди?

- Менга “Арсенал” томонидан қизиқиш бўлгани рост. “Анжи” рад жавобини берган. Доғистон клубига ўша пайтлар катта вазифа қўйилган ва мен асосий таркиб ўйинчиси эдим. Лекин ҳеч нарсадан афсус қилмайман. Аллоҳ ўшанда “Анжи”да қолишимни хоҳлаган экан.

- Ўшанда “Анжи” гранд клуб, Россиянинг ПСЖси бўлиши мумкин эди. Керимовнинг лойиҳаси нега барбод бўлди?

- Ҳаммаси бир кунда ҳал бўлган. Ўзимиз ҳам ҳеч нарсани тушунмай қолгандик. Машғулотга келган эдик, бизга ҳаммаси тамом бўлганини айтишди.

Жамоа олдига ўша мавсум чемпионлик учун курашиш вазифасини қўйишганди. Учта турда биз атиги битта ғалаба қозонгандик. Ўшанда Россия премьер-лигасида ғолиб чиқиш учун имкониятимиз камлигини тушуниб етгандик. Кейин ҳаммаси совун пуфагидек ёрилиб кетди. Раҳбарияти деярли барча футболчиларни сотиб юборишини тушундик. Ҳаммамиз шокда эдик...

Шомуродовга “Рома”дан кетишни тавсия қилишди...