Артём Филипосян асосий таркибдаги ўрни, Суперлигада ҳайрон қолдираётган клуб ва ОФК Кубогини қандай олиб келмоқчилигини айтди

“Сўғдиёна” сафига мавсум бошида қўшилган тажрибали ҳимоячи Артём Филипосян янги жамоасининг Ўзбекистон Кубогидаги беллашувларида майдонга тушяпти. Аммо ҳозирча уни Суперлигада у қадар кўраётганимиз йўқ.

Лекин унинг келиши жамоадаги рақобатни кучайтиргани рост. Шунинг учун мураббий олдида танлаш имконияти ва жиддий рақобат бор.

Куни кеча жиззахликлар Андижонда Кубок беллашувида майдонга тушишди ва 1:1 ҳисоби қайд этилди. Ушбу ўйиндан кейин Филипосян бир қатор масалаларда муносабатини айтди.

“Андижон” бемалол Суперлигага чиқа олади”

- Биз учрашувдан олдин ушбу ўйин қийин бўлишини билиб тургандик. “Андижон” яхши шаклланган жамоа. Кўп ўйинчилари бўйдор ва бақувват. Бу клубнинг устун томони шундаки, стандартлар ва узун паслар орқали ўйнайди. Бош мураббийи Виктор Кумиковни ҳамма яхши билади. Ҳар доим унинг стандарт вазиятлари хавфли бўлган. Мазкур учрашувдан аввал рақибнинг бир қатор ўйинларини кўрганимизда голларини асосан стандартлар ва аут орқали киритилганига гувоҳ бўлдик. Мана, бизга ҳам барибир стандарт вазиятдан гол уришди. Бизга қарши учрашувда андижонликлар яхши таассурот қолдирди. Ўзининг ажойиб мухлисларига эга. Қайд этилган 1:1 ҳисоби “Андижон” учун яхши натижа деб ўйлайман. Ўйин натижага мос бўлди. Биз пенальтидан ҳам гол ура олмадик. Агар “Андижон” шундай ўйин кўрсатишда давом этса, бемалол Суперлига йўлланмасини қўлга кирита олади.

“Ҳар бир ўйинда ғалаба қозонишимиз керак”

- “Сўғдиёна” учта фронтда ўйнайди. Ўзбекистон чемпионати, Ўзбекистон Кубоги ва ОФК Кубоги. Шунинг учун ҳар бир учрашувдан аввал майдонга ғалабани кўзлаган ҳолда тушамиз. “Сўғдиёна”нинг ўз мақсади бор. Чунки ўтган йили клуб 2-ўринни қўлга киритган. Натижада бизнинг жамоа фаворитлар қаторига қўшилди. Ўзимиз қатнашадиган учала фронтда ҳам узоқроққа бориш мақсади қўйилган. Машғулотларда ўз устимизда тинимсиз ишлаб турсак, умид қиламанки, вазифани бажарамиз. Иложи бўлса, ОФК Кубогини Ўзбекистонга олиб келмоқчимиз. Шунингдек, Ўзбекистон Кубогида финалга чиқишни ният қилганмиз. Табиийки, Суперлига баҳсларида ҳам совриндорлар қаторидан жой олишни хоҳлаймиз. Бунинг учун ҳар бир ўйинда ғалаба қозонишимиз керак.

“Кимни асосий таркибга киритиш – бу мураббийнинг ўзига боғлиқ”

- Уч йил четда тўп сурдим. Балки “Сўғдиёна” жамоасига тўлиқ мослашишим учун яна бироз вақт керакдир. Мураббийларнинг ўз тактик услуби бор. Шу пайтгача ўзимизда ўйнаган барча клубларнинг асосий таркибларида тўп сурганман. Бош мураббий Улуғбек Бақоев билан ҳам илгари бирга самарали ишлаганмиз. Унинг қўли остида ўзимни кўрсатиб, машғулотларда яхши қатнашишга ҳаракат қиляпман. Кимни асосий таркибга киритиш – бу мураббийнинг ўзига боғлиқ. Бизда коллектив аъло даражада. Олдинда ҳали ўйинлар кўп. Ўзбекистон Кубогида иккита ўйинни ўтказдим.

“Кимнидир фаворит сифатида кўрсата олмайман”

- Ҳозир ҳамма жамоа бир хил. Бу йил “Қизилқум”ни қандай старт олгани кўпчиликни ҳайрон қолдиряпти. Шунинг учун олдиндан гапириш қийин. Асосан 7-8-турлардан кейин ойдинлашади. Энди 4 та тур тугади ва барча клублар бир хил савияда. Бирор-бир жамоа ҳали яққол кўзга ташлангани йўқ. Кўряпсиз, “Пахтакор” “Олимпик” билан дуранг ўйнаб қўйди. “Навбаҳор” эса ютқазди. “Насаф” ўз майдонида “Металлург” билан дуранг қайд этди. Ҳозир кимнидир фаворит сифатида кўрсата олмайман. Яна бир неча турдан кейин жамоаларнинг ўрни билиниб қолади.

“Мавсумни яхши бошладик”

- Менинг фикримча, “Сўғдиёна” учун старт ёмон бошланмади. 4 та ўйин ўтказдик, жамоамиз ҳали ютқазмади. Фақат биз мана шундай тарзда давом этишимиз ва ўйинимизни кучайтириб боришда давом этишимиз лозим. Барибир биз мавсумни яхши бошладик, деб ўйлайман.

“ОФК Кубогида аввало гуруҳдан чиқишимиз лозим”

- Биласизми, “Сўғдиёна” олдин халқаро майдонларда ўйнамаган. Жамоамиз учун ОФК Кубоги илк халқаро мусобақа бўлади. Бироз қийин бўлиши мумкин. Чунки таркибда кўп футболчилар ҳали халқаро миқёсидаги ўйинларда ўйнамаган. “Насаф”да тўп сурган пайтимизда таркиб ҳам кучли бўлганди. Жамоа ҳам яхши шаклланганди. “Сўғдиёна”да ҳам барибир яхши ижрочилар бор. Насиб бўлса, Ўзбекистон номидан қатнашиб, муносиб ҳимоя қилишга ҳаракат қиламиз. Аввало, гуруҳдан чиқиш вазифасини бажаришимиз керак. Албатта ОФК Кубогида ҳам яхши жамоалар шаклланган. Яна қайтараман: аввало гуруҳдан чиқишимиз керак ва қолганини вақт кўрсатади.