Асрор Алиқулов: "Ўйин голларга бой ўтмаслиги аниқ эди"

Про лиганинг навбатдаги турида “Машъал” ўз майдонида “Қўқон-1912”га 0:1 ҳисобида ютқазиб қўйди. Учрашувдан сўнг мезбонлар устози Асрор Алиқулов бир қатор саволларга жавоб қайтарди.

- Ўйинга тайёргарлик жараёнида футболчилардан кўпроқ босимни енгишни талаб қилгандик. Бу жиҳатдан хотиржамлик ва ҳужумни бошлаш жараёни, лекин эҳтиёткорликни йўқотмаслик, стандарт ҳолатларга эътибор қаратилганди. Бироқ ҳаяжонни енгга олмадик. Биринчи бўлимда жуда кўп хатолар бўлди. Вазият яратдик, бирга-бир ҳолатга чиқдик. Афсуски, гол ура олмадик. Иккинчи бўлимни яхшироқ бошладик. Кейинчалик оддий эпизодда гол ўтказиб юбордик. Охирида кўпроқ вабанк – гол уриш учун катта куч билан олдинга ўтдик. Қайсидир ҳолатда футболчиларга маҳорат ва айримларига характер ва иккинчи куч етишмагани яққол билинди.

-  “Машъал” “Қўқон-1912”ни иккита ўйиндан бери юта олмаяпти. Аммо турнир жадвалида жамоа ҳар доим қўқонликлардан олдинда. Буни нимани ҳисобига деб ўйлайсиз?

- Биз “Қўқон-1912”га қарши учрашувларда камроқ вазиятлар яратяпмиз. Масалан, ўтган ўйинда рақиб майдонида иккита гол урдик, аммо учта гол ўтказиб юбордик. Олдига катта вазифалар қўйган жамоалар учун битта учрашувда бунча гол ўтказиш кўп деб ўйлайман. Бугун ҳам ўйин голларга бой ўтмаслиги аниқ эди, битта голгача эди. Кам сонли яратиладиган имкониятлардан албатта фойдаланишимиз керак эди. Иброҳим Ғанихонов яккама-якка имкониятдан гол урганида ўйин сценарийси бошқача бўларди. “Қўқон-1912” очилишга мажбур бўларди, олдинга чиқарди. Лекин улар гол уришди, яна ёпилди, вақт чўзишга ҳаракат қилишди ва ғалабани олиб кетишди.

- Жамоага янги қўшилган футболчилардан деярли фойдаланмадингиз...

- Айримлари жароҳатда. Машғулотларни яқинда бошлашди. Шу боис ҳали 100 фоиз тайёр эмас. Қайсидир ҳолатда Рашидхоновни ва яна бирини майдонга тушириш учун ушлаб тургандик. Аммо ўйин ҳолатидан келиб майдондагиларга ишонч билдиришда давом этдик. Кейинги учрашувларда уларга ҳам имконият берамиз. Тезроқ ўз спорт формасини тиклаб олишади.

- Захирадан уч нафар футболчини алмаштирдингиз. Лекин сизда яна иккита ўйинчи алмаштириш имконияти бор эди. Бунга эҳтиёж бўлмадими ёки бошқа режаларингиз бормиди?

- Рақиб чуқур ҳимояланганидан кейин тезкор ва креатив футболчилар керак. Рашидхонов қандайдир ҳолатда бу ўйинда ёрдам бериши мумкин эди. Аммо бошқа жиҳатларини ҳисобга олиб, Бабатунгега имконият бердик. Зич ҳимояланиб турганида футболчидан маҳорат талаб қилинади. Рашидхоновдан бошқа футболчиларнинг маҳоратига иккиландик. Ўйин вақтини ҳисобга олиб, биз бошқа ўйинчи алмаштирмадик.

- Чигози билан шартнома бекор бўлди. Бунга нима сабаб?

- Бу кўпроқ натижалардан. У икки давра жамоамизда бўлди, ҳаракат қилди. Бошида ҳаммаси 50х50 эди. Ким кучли бўлса, ўша ўйнайди. Самуэль рақобатда ютқазди. Легионер футболчини захирада ушлаб туришни хоҳламадик ва раҳбарият у билан шартномани бекор қилди.