Асрор Алиқулов: Шартномам йил охиригача, Суперлига клубидан таклиф бор

“Машъал” клуби Ўзбекистон кубоги 1/8 финал доирасида “Шўртан”ни 3:1 ҳисобида мағлуб этиб чорак финалга йўл олди. Беллашувдан сўнг, ғузорликлар устози Асрор Алиқулов матбуот анжуманида иштирок этди.

- Бугунги ўйин тўғрисида нима дея оласиз?

- “Машъал” Суперлига жамоаси эканлиги ва ҳеч қандай босим бўлмаслиги, аммо секин ўйнасак ва фикрласак қийин бўлишини футболчиларимизга уқтиргандик. Суперлига билан про-лигада фарқ жуда сезиларли. Лекин йигитларимизнинг майдондаги ҳаракатларидан қониқиш ҳосил қилсак бўлади. Хатоларимиз кўп бўлса-да, курашувчанлик жиҳатдан жамоамиз ўзини кўрсатишга ҳаракат қилди.

- Гол урган футболчингизни алмаштириб юбордингиз. У чарчаб қолдими ёки ўйинидан қониқмадингизми?

- У бизда асосий таркиб ўйинчиси. Йил давомида тўп суриб келди. Мавсум охирига келганда толиқиш сезилиб қолди. Ҳимояда сусткашлик бўлганида уни ёрдам беришига кучи ҳам етмай қолди. Ҳужумга ўтиш жараёнида ҳам кўп хатога йўл қўйди.

- “Шўртан” биринчи бўлиб гол урди ва кейин учта тўп ўтказиб юборди. Бу лигалар ўртасидаги савия билан боғлиқми?

- Биринчи навбатда савия билан боғлиқ. Чунки Суперлига футболчиларининг фикрлаши ва жисмоний ҳолати яхшироқ. “Машъал”нинг бир қатор футболчилари яққол ажралиб туришди. “Машъал”нинг савияси баландлиги уларнинг ютуғи бўлди.

- “Шўртан” энди қишки танаффусга чиқади. Жамоа қачондан йиғилади?

- Буни олдиндан айтиш қийин. Ҳал қилинадиган ишлар бор. Қачон тўпланади, қайси томонга ўзгариш бўлади, кўп нарса шунга боғлиқ.

- Клубда қоласизми?

- Шартномам йил охиригача. Аввало, бошқалар сингари таътилга чиқиб, бироз дам олмоқчиман.

- Бошқа клублардан таклифлар бўлдими?

- Таклифлар бор.

- Айнан қайси жамоадан? Суперлигаданми?

- Ҳа, Суперлига клубидан бор. Лекин аввал бироз ҳордиқ чиқарамиз. Чунки йил биз учун жуда оғир келди. Бошида ҳаммаси ўз қўлимизда эди. Кучли тўртликда эса жуда ёмон ўйинлар кўрсатдик. Футболчиларни бириктириш томонлама ҳам қийин бўлди. Олдимизга қўйилган вазифани бажара олмаганимиз қайсидир томонлама жамоанинг бирлашмагани билан ҳам боғлиқ.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар