БААда Жалолиддин Машарипов ва Отабек Шукуров дуэли бўлиб ўтди. Достонбек Ҳамдамов жамоасида мағлубият

Бугун БАА чемпионати 21-туридан ўрин олган "Шабаб Ал-Аҳли" - "Шаржа" учрашуви бўлди. Беллашув анча қизиқарли ўтди. Бир-бирига муносиб жамоалар тўқнашувини биргина гол ҳал этди. 28-дақиқада Карлос Эдуардонинг пенальтидан киритган голи "Шабаб"га ғалаба келтирди. Меҳмонларда ҳам 11 метрли жарима зарбаси тепиш имконияти бўлди. Бироқ шаржаликлар вазиятдан олишмади.  

Мезбонлар сафида Жалолиддин Машарипов асосий таркибда ҳаракат қилди ва 90 дақиқа тўлиқ ўйнади. Одилжон Ҳамробеков баҳс охирларига яқин захирадан майдонга тушди. Яна бир ҳамюртимиз Азизжон Ғаниев жароҳатини даволамоқда. Меҳмонлар таркибида эса, Отабек Шукуров дастлабки дақиқалардан майдонда тушиб, учрашувни тўлиқ ўтказди.

Достонбек Ҳамдамов тўп тепаётган "Ҳатта" меҳмонда "Хор Факкан" билан куч синашди ва мағлубиятга учради. Бу беллашувда ҳам битта гол урилди. 86-дақиқада Рамон Лопес мезбонларга 3 очко тақдим этган гол муаллифига айланди. Достонбек Ҳамдамов 90+3-дақиқада ўзгартирилди.

БАА чемпионати, 21-тур

"Шабаб Ал-Аҳли" - "Шаржа" 1:0

Гол: Карлос Эдуардо пенальти 28

"Хор Факкан" - "Ҳатта" 1:0

Гол: Рамон Лопес 86