Bahrom Haydarov: "Lokomotiv" bilan o‘yinda jamoa bilan birga emasdim, bu ichki vaziyat va kimdir bilishi shart emas"

“Surxon” klubi o‘z maydonida “Navbahor” jamoasiga qarshi kechgan og‘ir bellashuvda o‘ta muhim g‘alabani qo‘lga kiritdi va uch ochko egasiga aylandi.

Qizig‘i, termizliklar ushbu raqibini oxirgi marta 2003 yili mag‘lubiyatga uchratgan. O‘shanda ham Termizdagi uchrashuvda 1:0 hisobi qayd etilgan. Bir qarashda “Navbahor” “Surxon” uchun noqulay raqibdek edi. Biroq bu safargi bahsda Bahrom Haydarov boshchiligidagi jamoa nihoyat “Navbahor”ni taslim qilishning uddasidan chiqdi.

Turnir jadvalida “Surxon”ning holati havas qilarli emasdi. Xavfli hududdan uzoqlashish uchun ularga albatta g‘alaba suv va havodek zarur edi. Buni yaxshi tushunib turgan mezbonlar qiyinchilik bilan bo‘lsa-da, g‘alaba qozonishga muvaffaq bo‘ldi. Bellashuvdan keyin termizliklar bosh murabbiyi Bahrom Haydarov Sports.uz saytiga o‘yin xususidagi fikrlari bilan o‘rtoqlashdi.

- G‘alaba bilan tabriklayman. Ko‘pchilik o‘yindan oldin “Navbahor”ning imkoniyatlarini yuqori baholagandi. Ammo “Surxon” bunga rozi bo‘lmadi. O‘yin haqida nima deya olasiz?

- Tabrik uchun rahmat. Jamoamiz turnir jadvalida shunday o‘rindaki, qaysi raqib bo‘lsa ham g‘alaba uchun maydonga tushishga majburmiz. “Navbahor” ham kuchli jamoa, ammo bugun yutmasak ahvolimiz qiyinlashardi. Futbolchilar borlarini berishdi, buning uchun ularga rahmat.

- Raqibning tarkibi ham, o‘yini ham kuchliroq edi. Lekin “Navbahor”ning o‘yini g‘alabaga tortmasdi. Raqibni qanday qilib zararsizlantirdinglar?

- “Navbahor”da to‘pni nazorat qiladigan mahoratli futbolchilar jamlangan, bizning bugungi vazifamiz ularni to‘pni nazorat qilishiga yo‘l qo‘ymaslik edi va bunga erishdik.

- “Surxon” “Navbahor”ni oxirgi bor 2003 yili yutgan. Sizningcha, raqib noqulaymidi? 18 yildan beri yutolmayotgani sizni xavotirga solmaganmidi?

- Bu ma’lumotni o‘yindan keyin bildim.

- “Surxon”da yuz bergan muammolar va Asror G‘ofurovni diskvalifikatsiya qilinishi jamoaga qanday ta’sir ko‘rsatdi?

- Bizga hozirda har bir o‘yinchi qadrli. Asrorni ham o‘z o‘rni bor. Tez kunlarda muammolari hal bo‘lib, maydonga qaytadi, deb umid qilamiz.

- Nega oldingi o‘yinlarda sizni jamoada ko‘rmadik?

- “Lokomotiv” bilan o‘yinda jamoa bilan birga emasdim, bu jamoadagi ichki vaziyat va buni kimdir bilishi shart emas.

- Murabbiylik faoliyatingizdagi eng unutilmas g‘alaba sifatida qaysi o‘yinni ayta olasiz?

- 2020 yili Universiada finalini yutgan o‘yinimiz.

- O‘yindan avval futbolchilarni qanday ruhlantirdingiz va raqibning ojiz tomoni nimada edi?

- Hozirgi holatda yigitlarni futbolchi sifatida o‘z obro‘sini tiklash hamda jamoani yuqori o‘ringa ko‘tarilishi ular uchun eng katta motivatsiya. Lekin yigitlarni inson sifatida ham tushunishimiz kerak. Klub tomonidan ham ularni futboldan tashqari muammolarini hal qilishga harakat qilyapmiz. Hammamiz birlashib jamoani oldiga qo‘yilgan vazifani bajaramiz, Xudo xohlasa.

- Darvoqe, jamoa himoyachisi Murod To‘ychiboev nima uchun o‘yinlarda ishtirok etmayapti?

- Chunki uning jarohati bor, davolanyapti.

- Bahrom aka, Superligada qolish uchun kurash juda qiziyapti. Yana beshta tur qoldi. Bunday pallada bosim kuchlimi?

- Albatta bosim yuqori. Chunki katta bir Superliga jamoasining taqdiri hal bo‘lyapti.

- “Surxon”ni Superligada qolishiga kafolat bera olasizmi?

- Kafolat bermaslik sportchini ishi emas.