“Барса” “Челси”ни куйдирди

Каталония клуби “Челси” олишга ҳаракат қилаётган Гавини Лондонга қўйиб юбормайди. Аввалига 17 ёшли футболчи билан янги шартнома борасида бир тўхтамга кела олмаган “Барселона” мутасаддилари ниҳоят вундеркиндни қолишга кўндирди.

Айни пайтда томонлар музокаранинг сўнгги босқичига етиб келган. “Челси” вакиллари Гави ҳозирги клуби билан келиша олмаса, уни ёзда ўз сафига қўшиб олишни режалаштираётган эди.

“Барселона” раҳбарияти жамоа келажагини Гави билан боғлай бошлади. Лионель Мессини ўрнига ҳақиқий етакчига айланиши кутилган Ансу Фати кетма-кет иккинчи маротаба оғир жароҳат олганидан кейин каталонияликлар унинг келажагидан шубҳаланиб қолди.

Энди улар Гавини жамоанинг янги етакчисига айлантирмоқчи ва яқин келажакда асосий таркибни айнан мана шу футболчи атрофида шакллантиришни режалаштиряпти.

Вазиятнинг бу даражада ўзгариб кетиши “Челси”нинг Гавини ўз сафига қўшиб олиш имкониятларини йўққа чиқарди.