“Барса” футболчилари Хавининг ўрнига чемпион мураббий танлади

“Барселона” бош мураббийи Хави Эрнандес мавсум якунланиши билан жамоани тарк этишга қарор қилган.

Жамоа ўйинчилари ҳозирги бош мураббий ўрнига бошқаси қўл остида тўп тепмоқчи. Sport.es сайтининг хабар беришича, жамоа клуб раҳбарияти ПСЖни бошқараётган Луис Энрикени олиб келишини кутяпти.

Луис Энрике ўтган ёз Париж жамоаси бош мураббийлигини қабул қилиб олган эди. Унинг асосий вазифаси жамоани Чемпионлар лигаси ғолибига айлантириш ҳисобланади.

Испаниялик мутахассис ПСЖ билан икки йиллик шартнома тузган ва 2025 йилнинг ёзигача Франция пойтахтида ишлаши лозим. Айнан мана шу масала унинг “Барселона”га келишига тўсқинлик қилиши мумкин.

Эслатиб ўтамиз, Луис Энрике 2014-2017 йиллар давомида Каталонияда бош мураббийлик қилган ва унинг қўл остида жамоа Испания чемпионати, кубоги, Суперкубоги, Европа Чемпионлар лигаси,  УЕФА Суперкубоги ва клублар ўртасидаги жаҳон чемпионатида ғолиб чиққан.