“Барса” футболчиси бошқа жамоага ўтяпти

“Барселона” ҳужумкор футболчиси Ансу Фати январда бошқа жамоага ўтадиган бўляпти. Навбатдаги жароҳатдан кейин 21 ёшли ўйинчи асосий таркибга киришга қийналяпти. 

Клуб раҳбарияти Фатини ижарага жўнатишга қарор қилган. Истеъдодли футболчига Испания чемпионатининг яна бир жамоаси – “Севилья” қизиқиш билдирган. Андалусияликлар уни кейинчалик сотиб олиш ҳуқуқи билан ижарага сўраяпти. 

Яқин ўтмишда “Барселона”нинг энг иқтидорли тарбияланувчиси, Мессининг вориси сифатида эътироф этилган Ансу Фати ўтган мавсумни ҳам ижарада ўтказган эди. Испаниялик йигит бир мавсум Англия Премьер-лигасида “Брайтон” шарафини ҳимоя қилиб келди. 

Фатининг “Барселона” билан шартномаси 2027 йилнинг ёзигача тузилган. Бир пайтлар Каталония клуби 200 миллион еврога сотмаган ўйинчи ҳозир 25 миллион еврога баҳоланмоқда.