"Барса" гол уриш бўйича 85 йилдаги энг яхши натижани қайд этди

Каталониянинг машҳур клуби «Барселона» Испания чемпионати навбатдаги турида «Хетафе» дарвозасини уч марта ишғол этди. Рақиб жавоб голи ура олмади. Шу тариқа, каталонлар саккиз турда жами 34 та гол уришга эришди.

Бу кўрсаткич Испания чемпионати учун сўнгги саксон беш йилда қайд этилган энг яхши натижа ҳисобланади. Охирги марта бундай юксак самарадорликни «Севилья» 1940/1941 йилги мавсумда намойиш этган эди, ўшанда андалусияликлар 41 та гол урган. Шунингдек, 1930/1931 йилги мавсумда Бильбаодан «Атлетик» ҳам 34 та голга эришган.

Энди «Барселона»ни навбатдаги турда Севильяда жиддий синов кутмоқда. Каталон гранди бу сафар «Бетис» меҳмони бўлади. Ҳозирча «Бетис» турнир жадвалида тўртинчи ўринни эгаллаб турибди ва етти марта гол ўтказиб юборган. Қизиғи шундаки, шу пайтгача «Барселона» ҳам рақибларига айнан етти марта гол уриш имконини берган, яъни икки жамоанинг ўтказиб юборилган голнари сони бир хил.