“Барса” кутган тўпурар бошқа лигага кетиб қолмоқчи

“Челси” ҳужумчиси Пьер-Эмерик Обамеянг фаолиятида яна ўзгариш бўлиши кутилмоқда. 33 ёшли футболчи ўтган ёз “Барселона”дан трансфер қилинган эди. Бироқ, уни олиб келган Томас Тухель истеъфога чиқарилганидан кейин габонлик ўйинчи асосий таркибдаги жойини йўқотди.

Обамеянгни “Барселона” яна ортга қайтаришни режалаштираётган эди. Каталонияликлар уни ёзги трансферлар вақтида асосий нишон сифатидабелгилаган.

Todofichajes нашрининг таъкидлашича, Обамеянг ёзда Каталонияга эмас, Италияга кўчиб ўтиши эҳтимоли катта. Манба маълумотига кўра, “Интер” тажрибали тўпурарни ўз сафига қўшиб олмоқчи.

Миланликлар африкалик ҳужумчини аслида “Челси”га тегишли бўлган бошқа футболчи – Ромелу Лукаку ўрнида ўйнатишни мўлжаллаяпти.