“Barsa” Messining do‘sti uchun besh nafar yulduzni qurbon qilmoqda

“Barselona” hujum chizig‘ini kuchaytirish va yaqin kelajakda asosiy to‘purar Robert Levandovskining o‘rnini egallash uchun ko‘p gol ura oladigan hujumchi qidirayotgan edi.

Kataloniyaliklarga “Atletiko”da porlayotgan Xulian Alvares ma’qul keldi. Bu hujumchi “Barsa” afsonasi Lionel Messi bilan birga o‘ynab, 2022 yilgi jahon chempionatida g‘oliblikni qo‘lga kiritgan.

“Atletiko” o‘z to‘purarini 150 million evroga baholamoqda. Kataloniyaliklar bu summani 100 million evroga tushirishga harakat qilyapti.

Shunga qaramay, “Barselona” bu transferni amalga oshirish uchun besh nafar futbolchisidan voz kechishiga to‘g‘ri kelmoqda. Ispan matbuotining yozishicha, Inyaki Penya, Ansu Fati, Ronald Arauxo, Frenki de Yong va Ferran Torres klub tomonidan transferga qo‘yiladi.

Yana bir variant sifatida Alvaresni 36 yoshli to‘purar Robert Levandovskiga rokirovka qilish masalasi ham muhokama qilinmoqda.