"Барса" навбатдаги "эл класико"да тушум рекордини янгилайди
Бу ўйин ҳамманинг эътиборида
«Барселона» клуби навбатдаги «эл-класико» орқали чипта сотувидан тушадиган даромад бўйича ўз рекордини янгилаши кутилмоқда. SPORT нашри ёзишича, якшанба куни «Камп Ноу»да бўлиб ўтадиган «Реал»га қарши ўйин олдидан стадионда деярли бўш ўрин қолмаган.
Чипталар 29 сентябрдан сотувга қўйилган. Дастлабки босқичда энг арзон чипталар 299–640 евро оралиғида баҳоланган эди. Ҳозир эса қолган оддий ўринлар нархи кескин ошган: Gol 2 Superior секторидаги чипталар 1249 евро, марказий трибунадаги ўринлар эса 2099 еврогача чиқди. VIP-тўпламлар эса 2400 евродан 8000 еврогача бўлган нархда таклиф этилмоқда.
Ўтган мавсумнинг 10 май куни «Барселона» ўз майдонидаги «Реал»га қарши ўйин учун чипта сотиш орқали 16,4 миллион евро ишлаб олган эди. Ҳозирги ўйинда бу кўрсаткич янада ошиши мумкин. Бу, стадионда реконструкция ишлари туфайли барча ўринлардан фойдаланиш имкони йўқлигига қарамасдан, амалга ошиши кутилмоқда.
Изоҳлар (0)