“Барса” “Реал” кутаётган футболчини “илиб” кетмоқчи

“Бавария”нинг чап қанот ҳимоячиси Альфонсо Дэвис анчадан бери “Реал” нишонида туради. Мадридликлар бу ҳимоячини олиш учун бир неча бор музокара ўтказгани ҳақида хабарлар тарқатилган эди.

Сўнгги маълумотларга қараганда, канадалик футболчи келаси ёз Испаниянинг бошқа гранди – “Барселона”га ўтиб кетиши мумкин.

Испаниялик журналист Фернандо Полонинг маълум қилишича, Дэвиснинг ўзи “Бавария”ни тарк этиш мақсадида клуб билан мавсум охирида тугайдиган шартнома муддатини узайтиргани йўқ.

Бу бошқа клубларга январь ойидаёқ Дэвис билан дастлабки шартномани тузиб қўйиш имконини беради.

Каталонияликлар ҳам 50 миллион еврога баҳоланаётган 23 ёшли ҳимоячини эркин агент сифатида ўз таркибига қўшиб олиш имкониятидан фойдаланиб қолмоқчи.

Испан грандлари Альфонсо Дэвисни қўлга киритиш учун Англия Премьер-лигаси клублари билан рақобатлашишига тўғри келади.