"Барселона" етакчиси "Атлетико"га қарши ўйнамаслиги мумкин

"Барселона" Испания Кубоги ярим финалининг "Атлетико"га қарши бўладиган навбатдаги ўйинида Рафиньянинг хизматидан фойдалана олмаслиги мумкин.

Бразилиялик футболчи якшанба куни Ла Лиганинг "Жирона"га қарши баҳсида (4:1) захира ўриндиғида қолди.

Журналист Адрия Албетнинг хабарига кўра, Рафинья нафақат мушаклардаги ноқулайликни ҳис қилмоқда, балки оғир юклама туфайли жиддий чарчоқдан азият чекмоқда. Шу боис Ханс-Дитер Флик 2-апрель, чоршанба куни бўлиб ўтадиган Испания Кубоги ярим финали жавоб ўйинида уни майдонга тушира олмаслиги эҳтимолдан холи эмас.

Эслатиб ўтамиз, жамоалар ўртасидаги дастлабки учрашув "кўк-анорранглилар" майдонида ўтган бўлиб, 4:4 ҳисобида якунланган эди.