“Барселона” ҳужумчиси “Атлетико”га қарши муҳим учрашувни ўтказиб юборади

"Барселона" ҳужумчиси Маркус Рэшфорд тиззасидан олган жароҳати туфайли 12 февраль куни бўлиб ўтадиган Испания Кубоги 1/2 финалининг "Атлетико"га қарши дастлабки ўйинида иштирок этмайди. Бу ҳақда "Барселона" расмий сайти хабар тарқатди.

"Маркус Рэшфорд шанба куни "Камп Ноу"да "Мальорка"га қарши ўйинда олган зарбасидан кейин чап тиззасида оғриқ сезмоқда. Футболчи пайшанба куни "Атлетико Мадрид" билан бўлиб ўтадиган Испания кубоги ўйинини ўтказиб юборади", - дейилади клуб хабарида.

Испания чемпионатининг 23-туридан ўрин олган "Барселона" - "Мальорка" баҳсида "Барселона" 3:0 ҳисобида рақибдан устун келди. Маркус Рэшфорд 67-дақиқада захирага олинди.

Испания чемпионатининг жорий мавсумида 28 ёшли Маркус Рэшфорд 21 та ўйинда майдонга тушиб, 4 та гол урди ва 7 та голли узатмани амалга оширди. Шунингдек, у Испания кубогида учта ўйин ўтказиб, битта гол ва битта голли узатмани амалга оширган. Чемпионлар лигасида у саккизта ўйинда майдонга тушиб, бешта гол урди ва учта голли узатмани амалга оширди.