“Барселона” “Интер” юлдузини кузатмоқда

Испаниянинг "Барселона" клуби Миланнинг "Интер" клуби ва Италия терма жамоаси марказий ҳимоячиси Алессандро Бастонининг келажагини диққат билан кузатмоқда. Бу ҳақда инсайдер Маттео Моретто X ижтимоий тармоғида маълум қилди. Манбага кўра, футболчининг трансфер нархи каталонияликлар учун жуда қиммат, футболчининг ўзи эса ҳозирги клуби билан шартномани узайтириш бўйича музокаралар олиб бормоқда.

Бастони 2019-йилнинг ёзидан бери "Интер" шарафини ҳимоя қилмоқда. Икки йил олдин ҳимоячи "Аталанта"дан 31,1 миллион еврога сотиб олинган, аммо 2017/2018 ва 2018/2019-йилги мавсумларни Бергамо клуби ва "Парма"да ижара асосида ўтказган. Жорий мавсумда 26 ёшли италиялик футболчи барча мусобақаларда 32 та ўйинда битта гол ва олтита ассистни ўз ҳисобига ёздириб қўйди.