"Барселона" италиялик ярим ҳимоячини кузатмоқда

"Барселона" клуб бир неча ойдан буён Сандро Тоналини кузатишда давом этмоқда. 
 
"Mundo Deportivo" нашрининг маълумотларига кўра, "кўк-анорранглилар" "Ньюкасл" сафида ўйнаётган италиялик ярим ҳимоячи Тоналини кузатиб бормоқда. Клуб техник ходими Андреа Манчини футболчини батафсил ўрганмоқда ва ҳозиргача олинган ҳисоботлар жуда ижобий. 
 
Сандро 70 миллион еврога АПЛ клубига ўтган ва 10 ой давомида футбол ўйнамасдан кейин асосий таркиб футболчисига айланди. Бир неча кундан буён эса унинг А Серияга қайтиши ҳақида миш-мишлар бўлса-да, футболчининг агенти Англияда қолишини тасдиқлади. 
 
Каталонияликлар футболчини аввал ҳам сотиб олишга ҳаракат қилган. 2020 йилда "Барса" 65 миллион евро ва иккита ёш футболчи таклиф қилган, аммо келишув амалга ошмаган эди. 
 
Эслатиб ўтамиз, 24 ёшли хавбек жорий мавсум 35 та беллашувда майдонга тушиб, 3 та гол ва 2 та голли узатмага муаллифлик қилган. Унинг клуб билан амалдаги шартномаси 2028 йилгача мўлжалланган бўлиб, Тransfermarkt порталидаги нархи 45 миллион евро деб баҳоланмоқда.