"Барселона" сардори ноябрь ойи охирида жароҳатдан тўлиқ фориғ бўлади

"Барселона" дарвозабони ва сардори Марк-Андре тер Штеген ўтган июль ойида белидан олган жароҳатидан сўнг реабилитациянинг якуний босқичида. Бу ҳақда Sport.es хабар берди.

Манбага кўра, 33 ёшли посбон аллақачон Каталония клуби базасидаги чим устида машғулот ўтказмоқда. Германиялик футболчи ноябрь ойи охиригача жароҳатидан тўлиқ фориғ бўлиши кутилмоқда.

Таъкидланишича, тер Штеген соғайиб кетгач, "Барселона" раҳбариятидан клубдаги келажаги борасида қарор кутади. Қишда футболчи бошқа клубга ижарага берилиши ёки "Барселона"ни бутунлай тарк этиши эҳтимоли йўқ эмас.

Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 8 млн еврони ташкил этади.