"Барселона" трансформацияси! Худди ўша футболчилар билан умуман бошқа жамоа

Ўтган мавсумлардаги “Барселона”нинг муваффақиятсизлигига доим кам ресурслар муаммоси сабаб қилиб кўрсатиларди. Хави матбуот анжуманларида буни қайта-қайта айтар, Лапорта ҳам қисман клубдаги молиявий инқирозни тушуниб, унга ҳаддан зиёд катта юкламалар қўймасди. Мисол учун, “Барселона” Хави бошқарувида ҳатто икки мавсум Европа лигасида ўйнади. Чемпионлар лигасида гуруҳдан чиққан ўтган мавсумда эса узоғи чорак финалгача борди. Бир маротаба Ла Лигани ютди, икки маротаба эса “Реал” Испания чемпиони бўлди. “Барселона”дек клубга асосий рақобатчиси олдида бу қадар заифлик яқин йилларда кузатилмаган ҳолат эди. Ҳаттоки, “Реал” кетма-кет уч маротаба ЕЧЛни ютган мавсумларда ҳам “Барселона” Ла Лигада ва “эл-класико”ларда ўз имиджини сақлаб қолган ҳолда, иштирок этарди. Раҳбарият Мессидан кейинги давр ва молиявий инқироз фонида бу натижаларни қабул қилишга мажбур эди.



Хавининг ўзи кетишни истагани ва Лапорта билан ҳам бўлган кичик келишмовчиликлар сабаб Хави проекти тўхтади. Жамоани интизомни биринчи ўринга қўювчи, “Бавария” билан катта совринларни ютган (требл қилган) Ханс-Дитер Флик қабул қилиб олди. Унга мураббий сифатида баҳо бериш бироз қийин эди. Сабаби, унда ушбу сферада ўта катта тажриба йўқ эди. Яъни у “Бавария” билан ҳаммасини ютган, бироқ Германия терма жамоасида бироз муваффақиятсиз фаолият олиб борган. Айтадиган бўлсак, у Анчелотти, Гвардиола, Тухель ёки Луис Энрике каби кўп йиллик тажрибага эга “премиум класс” мураббийлар сирасига кирмас, аммо шунга жуда яқин тип эди. Бироқ ушбу мавсумдан кейин катта эҳтимол у аниқ “премиум класс” синфига киритилади. Агар ҳозирданоқ кирган бўлмаса...



Мавсум аввалида у “Барселона”ни қабул қилиб олган пайтда вазият бироз чигал эди. Клубнинг молиявий ҳолати сабаб катта трансферлар қилишнинг имконияти йўқ эди ва фақатгина Дани Ольмо ва Пау Виктор трансфери амалга ошди. Шунингдек, клубни кутилмаганда Илкай Гюндоган тарк этди. Педри, де Йонг, Араухо ва Кристенсен каби етакчилар жароҳати боис мавсум аввалини ўтказиб юбораётганди. Фликнинг ўзи Ла Лига стартидан аввал бор ресурслардан максимал фойдаланишини ва жамоада анча сифатли ижрочилар борлигини таъкидлаганди. Муҳими, унинг ўзи умидсизликка тушмаётганди. Клуб мавсум стартини яхши ўтказди. Ла Лигада кетма-кет ғалабалар, аммо ЕЧЛда 1-турдаёқ “Монако”га мағлуб бўлганди. Илк “эл-класико” 4:0’дан сўнг “Реал” билан Ла Лигадаги фарқ ҳам анча катталашди. Бу орада клуб ЕЧЛда ҳам муваффақиятли иштирок этиб, ишончли ғалабаларни қўлга киритаётганди.



Аслида, Флик қўл остидаги “қўрқинчли “Барселона” атамасини маълум 10 кунликдан сўнг ишлата бошладик. “Севилья” 5:1, “Бавария” 4:1 ва “Реал” 4:0 ҳисобида мағлуб бўлган кетма-кет учрашувлардан сўнг кўпчиликда немис мутахассиси қўл остидаги “Барселона” ҳақида асосий тасаввурлар шаклланганди. Бироқ орада омадсизликлар ҳам кузатилди. Ноябрь ва декабрь ойларида клуб Ла Лигада кетма-кет очколар йўқотди. Бунинг эвазига Ла Лигада “Реал” ва ҳатто “Атлетико” уларни қувиб ўтишни уддалади. 2025 йил аввалида “Реал” билан Ла Лигада 7 очколик фарқ ҳам юзага келди. Фликнинг офсайд чиғизини ушлаш услуби мазкур даврда ҳатто танқид ҳам қилинаётганди.



Айтиш керакки, “Барселона” 2024-2025 мавсумдаги жамики муваффақиятсизликларини ўша ноябрь ва декабрь ойида жамлаган экан. 2025 йилда клуб кетма-кет ғалабаларни қўлга киритди. Испания чемпионатида “Хетафе” ва “Бетис”га қарши учрашувларда дуранг, қолган барча беллашувларда эса 3 очко қўлга киритилди. Испания кубогида “Бетис” ва “Валенсия” устидан йирик ҳисобдаги ғалабалар. Ярим финалда эса асосий рақобатчиларидан бири бўлган “Атлетико” маҳв этилди. Яқинда бўлиб ўтган финалда эса “Реал” мағлубиятга учратилди. “Барселона” 2025 йилни бу қадар кўтаринки ўтказиши учун яна бир туртки сифатида йил аввалида қўлга киритилган Испания Суперкубоги ғолиблигини ҳам айтсак бўлади. Балки илк соврин ва асосий рақобатчи устидан қозонилган йирик ҳисобдаги ғалаба (5:2) “Барселона”нинг кайфиятини ҳаддан зиёд кўтариб юборган бўлса, ажаб эмас.

Қўшимча қиладиган бўлсак, “Барселона” жорий мавсумда ҳарактер нуқтаи-назаридан ҳам катта ўсишга эришди. Ҳа, биз билган Хавининг “Барселона”си мураккаб вазиятлардан чиқишга қийналарди. Флик қўл остида йирик ҳисобдаги ғалабалардан ташқари ирода намойиш этилган ҳолатлар ҳам кўплаб топилади. “Бенфика”га қарши Европа Чемпионлар лигаси гуруҳ босқичидаги баҳс (4:2’дан 5:4), Ла Лига доирасида “Атлетико” (2:0’дан, 4:2) ва “Сельта”га қарши (3:1’дан 4:3) ўйинларда футболчиларда охиригача курашиш характери шаклланганига исбот. Айниқса, “Сельта” ва “Атлетико”га қарши беллашувлар Ла Лигада мавсум якунига яқин содир бўлгани ва “Реал” уларни қувиб келаётгани нуқтаи-назаридан олиб қарасак, ўта аҳамиятли камбэклар бўлди.



Ҳозирга қадар “Барселона” Флик қўл остида иккита совринни ютиб бўлди. Бироқ энг кўп кутилаётганларига ҳали эришилгани йўқ. Олдинда Ла Лига ва УЕФА Чемпионлар лигаси баҳслари бор. Аслида, бу иккисида ҳам (айниқса Ла Лига) шоҳсупага йўл жуда яқин. “Барселона” сўнгги бор 2015 йилда требл қилган. Шундан сўнг жамоа бирор маротаба бунга яқин ҳам келмади. 10 йил ўтди ва клуб бунга жуда яқин. Ўйин услуби, спорт форма, курашувчанлик ва футболчиларда ўз кучига бўлган ишонч томонлама олиб қарасак, чиндан ҳам шундай.






 

КАРИМ Худайқулов