«Барселона» ва «Реал»нинг «душмани» оёққа турди

Айни дамга келиб, «мартасчилар» сайёрамизнинг энг барқарор клубига айланди. Диего Симеоне бугунги кунда клубнинг ҳар жабҳада олдинга қадам ташлаши учун шароит яратиб бермоқда. Бугун ушбу клубга доир ижобий омиллар ҳақида сўз боради.

1.01 миллиард евро

Сўнгги 10 йил ичида клуб трансферлардан шунча соф даромад қилишга муваффақ бўлди. Бу Испаниядаги мутлақ рекорд сумма. Тўғри, «Барселона»да бу кўрсаткич 800 миллион евродан ортиқ, бироқ бунинг 4/1 қисмини Неймарнинг трансфери ташкил қилади. «Реал»даги 881 миллионнинг 100 миллиони Роналдунинг Туринга кўчиб кетиши билан боғлиқ. Боз устига, сўнгги йилларда жамоа трансфер сиёсатини ўзгартирди. «Барселона» ва «Реал» таркибни кучайтириш учун 100 миллионлик футболчиларни сотиб олаётган бир пайтда, «Атлетико» йилига 300 миллион евро даромад кўрди. Жамоа ўз етакчиларини қўйиб юборган бўлса-да, таркибнинг суягини сақлаб қолмоқда. Шу боис, клуб пандемияда қолганлардан анча камроқ зарар кўрди.

32 миллион евро

Бу Диего Симеоненинг маоши. Шартнома 2022 йилга қадар мўлжалланган бўлиб, мураббий дунёнинг энг катта маош олувчи мутахассиси саналади. 2011 йилдан бери жамоа билан иш олиб бораётган Диего агар шартномани узайтирмоқчи бўлса, маошини кескин камайтирилишига рози бўлиши лозим. Ҳозирги кунда, Симеоненинг солиқлардан ташқари ойлик маоши 1,5 миллион евродан баланд.

87,5 фоиз

Сэйвлар сабабли Ян Облак «Атлетико»ни чемпионлик сари етаклаб келмоқда. Бу мавсумда кипер дарвозаси сари йўлланган 48 та зарбанинг атиги 7 тасини қўйиб юборди, холос. Уларнинг иккитаси автогол бўлса, яна биттаси пенальтидан урилган. Бундан кўрниб турибдики, жорий мавсумда Ла Лига баҳсларида Облак ўйин жараёнидан атиги 4 та гол ўтказиб юборган, холос. Шунчаки фантастик натижа! Ҳатто, ПСЖ посбони - Кейлор Наваснинг ҳам статистикаси бундан анча пастроқ.

36 та имконият

Карраско ва Триппьер жамоанинг чинакам плеймейкерига айланиб бормоқда. Бу йигитлардан бири ФИФА томонидан қаттиқ жазоланган бўлса, иккинчиси яқинда Хитойдан қайтиб келди. Шунга қарамай, Симеоне ҳужумларни айнан улар орқали ташкил қилишда давом этмоқда. Боз устига, аргентиналик мутахассис секин-аста Жоао Фелишни асосий таркибга жойлаштирмоқда. Португалиялик иқтидор ҳам ўтган мавсумдагидан анча ишончли кўринмоқда.

23 та футболчи. Симеоне секин-аста янги номлар учун янги позициялар кашф этишга киришди. Ҳозирда, фақат Облак ўз позициясида 90 дақиқа тўп сурмоқда. Қолган барча футболчилар бошқа позицияларда синаб кўрилди. Суаресни ҳужум ортида, Фелишни марказий ҳужумда, Карасскони қанот ҳимоясида, Лемарни таянч зонасида, Льорентени марказдаги деярли барча қисмида тўп сурганига гувоҳ бўлдик. Умуман олганда, аргентиналик мураббий ўз футболчиларини универсал бўлишини истамоқда. Бу эса, айрим ўйинларда майдоннинг ўзида янги схемага ўтиш ва вазиятдан келиб чиқиб, майдонда қарор қабул қилишда қўл келиши аниқ.

14 та турда 11 та гол - киритган Луис Суарес «Барселона»даги Мессидан тўпурарлар пойгасида ўзиб кетди. У кучли бешликдаги барча ҳужумчилар орасида 7-ўринда бормоқда. Айнан Суарес «Атлетико»нинг майдондаги асосий мотиваторига айланиб бормоқда. Ундаги ғалабага чанқоқлик, узоқ кутилган чемпионликка олиб бориши мумкин. Шу боис, Симеоне айнан унинг атрофида ҳужум уюштиришга тиришмоқда.

6 та гол ва 4 та ассист - Маркос Льоренте ҳам секин-асталик билан футболни забт этишни бошлади. «Реал»дан 30 миллион евро эвазига сотиб олинган Маркос 25 ёшгача «Реал»нинг кераксиз футболчиси эди. Энди эса, «Атлетико»да ўзини топди. Ҳатто терма жамоадан ҳам чақирув олди. Ундаги прогресс сабабли, Симеоне майдон марказида эркинроқ ҳаракат қилувчи футболчиларни майдонга туширмоқда. Маркос исталган паллада таянч зонасида пайдо бўлиши, керакли паллада ҳужумкор ярим ҳимоячига айланиши мумкин.

Ҳар бир ўйинда ўртача 0,38 та гол -  ўтказиб юбораётган «Атлетико» кучли бешликнинг энг яхши натижасини қайд этмоқда. «Матрасчилар» ҳимояда бехато тўп суриш орқали, секин-аста чемпионлик учун дадил қадамлар ташлашни бошлаб юборди. Европада фақат Шотландия чемпионати етакчиси «Глазго»да бу кўрсаткич Мадрид клубиникидан яхшироқ.

Эътиборлиси шундаки, сўнгги йилларда бир неча бор «Атлетико»нинг таркиби ўзгариб кетди. Фалькао, Габи, Годин, Миранда, Хуанфран, Куртуа, Луис Фелипе, Диего, Турани бор пайтда ҳам мадридликлар агрессив футбол намойиш этар эди. Уларнинг ўрнини бошқа футболчилар эгаллаганда ҳам клуб ўз фалсафасидан воз кечгани йўқ. Тан олиш лозим, бу услубдаги футбол клубга Испаниядаги асосий грандларга қарши курашда қўл келмоқда.

«Барселона» ва «Реал» тушиб қолган вазиятдан унумли фойдаланиш ва чемпионликни илиб кетиш учун Симеоне қўлидан келган барча ишни амалга оширмоқда. «Реал» ва «Барса» сингари грандлари бор чемпионатда ғалаба қозониш осон эмас, бироқ бундан аввал Диего бу икки бор уддалаган. Аввалига футболчи сифатда, кейин мураббий сифатида. Ҳозир унда 3 бор Ла Лиганинг олтин медалларига эга чиқиш имконияти мавжуд. Қаҳрамонимиз ҳозир 51 ёшда. Унинг нақд 15 йил умри «Атлетико» жамоаси учун бағишланди. Бу йилларнинг самараси ўлароқ, чемпионлик тантана қилинса, адолатдан бўлади. Айнан унинг келиши Мадрид клуби учун янги имкониятлар эшигини очди. Унга қадар, клуб Ла Лигани 7-9 ўринда ҳам якунлар, бунга ҳеч ким ҳайрон бўлмас эди. Ҳозир эса, «Атлетико»нинг очко йўқотиши, тур сенсациясига айланади. Жамоадаги прогресс киши кўзини қувнатмоқда.