Ҳусанов “ЖЧ-2026”ни бошламай туриб рекорд ўрнатди!
ФИФА ташкилоти футбол оламининг энг йирик мусобақаси – 2026 йилги жаҳон чемпионатига қуръа ташлаганидан кейин нуфузли манбалар турли йўналишлар бўйича ўз таҳлилларини мухлислар эътиборига ҳавола этиб келмоқда.
Айни пайтда АҚШ, Канада ва Мексика биргаликда мезбонлик қиладиган мундиалнинг 42 та иштирокчиси аниқ бўлиб улгурган. Яна олти мамлакат терма жамоаси март ойида минтақавий ва қитъалараро плей-оффлар якунига кўра аниқланади.
Ўзбекистон миллий терма жамоаси кўпчиликнинг диққат марказида бўладиган гуруҳдан жой олди. “К” гуруҳига тушган ҳамюртларимиз мундиалнинг дастлабки икки учрашувида Колумбия ва Португалияга қарши ўйнайди.
Бўлажак жаҳон чемпионатида футбол тарихида энг кўп гол урган Криштиану Роналду учун охирги мундиал ҳисобланади. Жаҳон чемпионлиги 40 ёшли ҳужумчи забт этолмаган ягона чўққи ҳисобланади. Футбол жамоатчилиги айнан Роналдудек футбол афсонасининг фаолиятини диққат билан кузатиш мақсадида “К” гуруҳидаги ўйинларга алоҳида эътибор қаратади.
Трансферларга ихтисослашган яна бир йирик манба – TransferRoom маркази 2026 йилги жаҳон чемпионатида дебют қиладиган терма жамоаларнинг энг қиммат ўйинчилари рейтингини тузиб чиқди. Ҳозирча, 2026 йилги жаҳон чемпионатида тўрт нафар терма жамоа – Ўзбекистон, Иордания, Кабо-Верде ва Кюрасао футболчилари илк бор майдонга тушиши ҳал бўлган.
Ушбу рўйхатни шакллантиришда футболчиларнинг TransferRoom маркази томонидан белгиланган трансфер қийматлари асос қилиб олинди.
Унга кўра, “Манчестер Сити” клуби ва Ўзбекистон миллий терма жамоаси ҳимоячиси Абдуқодир Ҳусанов 2026 йилги жаҳон чемпионати дебютантлари орасида энг юқори баҳоланган футболчи сифатида рекорд ўрнатади.
TransferRoom рейтингида 21 ёшли ўзбек футболчиси 47,8 миллион евро қиймат билан “топ-10”да энг юқори поғонада қайд этилган.
Рўйхатнинг иккинчи қаторида Испаниянинг “Вильярреал” клубида ўйнаб келаётган Кабо Верде терма жамоаси марказий ҳимоячиси Логан Кошта қайд этилган. Портал унинг трансфер нархини 21,7 миллион еврога тенглаштирди.
Кейинги икки ўринни Ўзбекистон миллий терма жамоасининг Туркия чемпионатида “Истанбул Башакшеҳир” клуби шарафини ҳимоя қилаётган ҳужумкор футболчилари – Аббосбек Файзуллаев ва Элдор Шомуродов эгаллади.
TransferRoom 22 ёшли Файзуллаевни 10 миллион еврога, 30 ёшли Элдор Шомуродовни 9,3 миллион еврога баҳолаб, ҳамюртларимизни мос равишда учинчи ва тўртинчи поғоналарга жойлаштирди.
Кучли бешликни жаҳон чемпионатида илк маротаба иштирок этадиган Осиё қитъасининг яна бир вакили Иордания терма жамоаси ҳужумкор футболчиси Муса Тамари якунлаб берди. Франциянинг “Ренн” клубида ўйнаб келаётган чарм тўп устаси 8,9 миллион еврога нархланган.
Кейинги ўринларда Англиянинг “Милдсборо” жамоасида ўйнаб келаётган кюрасаолик Сонтье Хансен (5,7 миллион евро), Кабо-Верденинг уч нафар ўйинчиси – Вагнер Пина (“Трабзонспор”, Туркия, 5,6 миллион евро), Кевин Ленини (“Краснодар”, Россия, 4,3 миллион евро), Сержиньо (“Ал-Васл”, Бирлашган Араб Амирликлари, 4,2 миллион евро) ҳамда Иордания терма жамоаси марказий ҳужумчиси Таммер Бани (“Вест Бромвич”, Англия, 4,1 миллион евро) қайд этилган.
Манбада қайд этилишича, қитъаларларо плей-офф натижаларига кўра, мундиалнинг дебютант жамоалари рўйхатига яна бошқа жамоалар ҳам қўшилиши мумкин. Лекин уларнинг таркибида нархи Абдуқодир Ҳусановникидан баланд бўлган бирорта ўйинчи йўқ.
Ўзбекистон улкан ҳурматга лойиқ! Португалия устози Мартинес яна нималар деди?
“Манчестер Сити” Ҳусановнинг жаҳон чемпионатида иштирок этишига қандай муносабат билдирди?
Энди бор умид Шомуродовдан! “Башакшеҳир”да катта йўқотиш
Бу хатодан кейин Гвардиола Ҳусановни асосий таркибга қайтариши шарт
Фикрлар