«Барселона» Влахович ёки Аслани билан шартнома имзолаш имкониятини кўриб чиқмоқда

«Барселона» жорий ёзда икки марказий ҳужумчини бирданига таркибга қўшиши мумкин. Бу ҳақда Diario Sport нашри хабар берди.

Маълумотларга кўра, ҳужумчи Ферран Торреснинг жамоани тарк этиши эҳтимоли юқори. Шу боис каталонияликлар яна бир марказий форвард билан шартнома имзолаш имкониятини кўриб чиқмоқда. «Блауграна»нинг асосий мақсади сифатида ҳозирча Мадриднинг «Атлетико» клуби сафида тўп суриб келаётган, 26 ёшли Хулиан Альварес қолмоқда. Шу билан бирга, клуб раҳбарияти унга алтернатив вариантларни ҳам ўргана бошлаган.

Қизиқиш билдирилаётган номзодлар орасида «Ювентус»нинг 26 ёшли ҳужумчиси Душан Влахович ҳам бор. Унинг Италия клуби билан шартномаси якунига етган ва у ҳозир эркин агент ҳисобланади. Манбаларга кўра, Влахович «Барселона»га ўтиш имконияти пайдо бўлса, маош борасида талабларини пасайтиришга тайёр. Влаховичдан ташқари, каталонияликлар «Хоффенхайм» таркибида ўйнаётган, 23 ёшли Фисник Асланига ҳам назар ташламоқда. Унга дортмундлик «Боруссия» ҳам жиддий қизиқмоқда. Бироқ хабарларга кўра, футболчининг ўзи музокараларни шоширмаяпти, чунки у эҳтимолий «Барселона» таклифини кутмоқда.

Аввалроқ тарқалган маълумотларга кўра, Ферран Торрес 2026 йилги жаҳон чемпионатидан сўнг «ПСЖ» сафига ўтиши мумкин.