"Бавария" устози Хасан туфайли жамоадан кетмоқчи

"Бавария" бош мураббийи Ханс-Дитер Флик клуб спорт директори Хасан Салихамижич билан келиша олмаётгани сабаб, жамоадан кетиши мумкин. Бу ҳақда Bild нашри хабар тарқатмоқда.

Юқоридаги манбага кўра, германиялик мутахассис клуб раҳбарияти тажрибали ҳимоячи Жером Боатенг билан шартнома узайтирилмаганидан қаттиқ ранжиган. Айтиш керакки, Боатенг энди ёзда жамоани эркин агент сифатида текинга тарк этади.

Бундан ташқари, Боатенгнинг кетиши ҳақидаги хабар ПСЖга қарши ЕЧЛ 1/4 финал ўйини арафасида эълон қилингани Фликнинг жаҳлини чиқарган. Шу сабабли Ханс-Дитер мавсум якунлангач жамоадан кетиш ҳақида ўйлай бошлади.

56 ёшли Флик "Бавария"ни 2019 йилнинг ёзида қабул қилиб олган эди. Унинг қўл остида жамоа Германия чемпиони ва кубогида зафар қучди, Чемпионлар лигасида ғолиб бўлди.