Бахтиёр Ашурматов: "Истеъфога чиқаман деб айтгандим..."

Локомотив” – “Қўқон-1912” (1:2) учрашувидан кейин меҳмонлар устози Бахтиёр Ашурматов матбуот анжуманида қатнашди.

- Бугун ютмасак бўлмасди. “Насаф” билан учралган мағлубиятни жуда оғир қабул қилдим. Ўйиндан кейин Рўзиқул ака Бердиевни олдига бориб ғалаба билан табрикламаганимни гапирганлар ҳам бўлди. У вазият учун узр сўрайман. Ўша пайтда жуда қизишиб тургандим. “Насаф” тўпни тепиб юбориш керак, деган фикрда эдим. Рўзиқул акани жуда ҳурмат қиламан. Шу боис нимадир гапириб юборишдан қўрқдим. Аммо ўйиндан кейин гаплашиб олдик. “Сурхон” билан ўйин олдидан йигитларга, бугун ютмасак истеъфога чиқаман, деб айтгандим. Қўқонликман, бош кўтариб юриб бўлмайдиган бўлиб қолганди. Тўғри, таркибимизда муаммолар бор ва бу муаммолар билан мағлубиятга учраганимизни гапирмаган бўлардим. Чунки биз таянч ярим ҳимоячисиз ўйнаяпмиз. Ойбек Рустамовда тўртта сариқ карточка бор. Дилшод Раҳматуллаев қизил карточка олганди. Мурод Холмуҳаммедов бир ярим ойдан бери жароҳат билан юрибди. Шу боис муаммоларимиз етарли эди. Аммо раҳбариятга миннатдорчилик билдираман. “Сурхон” билан учрашувдан кейин истеъфога чиқаман десам, бу нотўғри йўл эканини, вазиятдан чиқиб кетиш мумкинлигини айтиб, менга ишонишларини таъкидлашди. Бу эса менга қўшимча катта куч бағишлади. Натижада ҳеч нима ҳақида ўйламасдан кейинги ўйинга тайёрланиб, ғалаба қозонишга ҳаракат қиламиз, деб йигитларга айтдим. “Сурхон” билан босим остида ўйнаган бўлсак, бугун футболчиларга эркинроқ ўйнашларини, меҳнат қилсак Худо ҳам шунга яраша тақдирлашини билдирдим. Учрашув оғир бўлди. Ярим ҳимоямизда ҳимояга асосланган футболчи йўқ эди. Лекин ўйлайманки, Қувондиқ Рўзиев билан Жавоҳир Сидиқов катта ҳажмдаги ишни бажаришди. Охиригача курашишди. Мурод Холмуҳаммедовни қайтгани мухлисларни ҳам, бизни ҳам хурсанд қилди. Жамоамиз учун катта аҳамиятга эга эканини бугунги ўйин ҳам кўрсатиб берди. Чунки “Сурхон”га қарши учта қулай стандартлардан фойдалана олмагандик. Муроднинг қайтиши жамоамизга қўшимча куч бағишлайди.

Тан олиш керак, “Локомотив” мағлубиятга лойиқ эмасди. Чунки иккинчи бўлимда устунлик билан ўйнашди. Коростиченко яхши жамоа тузган. Ўтган йилга нисбатан ўзгариш бўлган. Тўғри, бир хил даражада ўйин кўрсатишмаяпти. Аммо яхши таассурот қолдиришяпти. Бу ўйин учун “Локомотив” ва ўзимни футболчиларимга жанговар учрашув учун миннатдорчилик билдираман. Бизга ишонган раҳбарларимиз ва мухлисларимизга раҳмат айтаман. Шу темпни сақлаб қолсак, кейинги ўйинларда ҳам бемалол ғалаба учун ўйнашимиз мумкин бўлади.

- Охирги дақиқаларгача адреналинга бой ғалаба бўлди. Биринчи голдан кейин жамоага тажовузкорлик етишмаётгандек эди...

- Тўғри. Афсуски, биз йўқ жойдан гол ўтказиб юбордик. Футболчиларимга дарвозамизга яқин жойда ишончли ўйнаш ва тўпни узоқлаштириш кераклиги ҳақида айтаман. Ўзимизни хатоимиз эвазига гол ўтказдик. Бу гол “Локомотив”га катта устунлик бериб қўйди. Биз қарши ҳужумлардан фойдаланиш имкониятига эга эдик. Бироқ Билол Тошмирзаев жароҳат олиб ўйинни давом эттира олмади. Жамшид Ҳасановни эса ярим ҳимояга сурдик. Катта ҳажмдаги ишни бажарганлиги сабабли у ҳам қарши ҳужумларга ўтишда қийналди. Натижада қарши ҳужумлардан маҳрум бўлиб қолдик. Ярим ҳимоячиларимиз чарчаб қолди. Жамшид Ҳасановни ўнг қанот ҳимоямизда муаммолар бўлиб турганлиги боис шу позицияга қўйдик ва бўшлиқни яхши тўлдирди. Бизга ҳам ғалаба зарур эди. Иккита ҳужумчи билан қолдик. Кейин қийин вазиятга тушиб қолганимиз боис Холмуҳаммедовни майдонга тушириб, марказни кучайтиришга ҳаракат қилдик. Муродни тушириб катта таваккал қилдик. Бир ой давомида соғлигини тиклаш билан банд бўлди. Бугун жароҳат олиши мумкин эди, аммо жамоага тайёрлигини билдирди.

Биласизми, Муродни майдонда бўлиши барчага ишонч бағишлаб туради. Унга ҳеч қандай босим ҳам таъсир қилмайди. Натижада қийин вазиятда Холмуҳаммедов орқали чиқиб кета оламиз. Ўйин охирига келиб тўп назорати ҳам биз томонга ўтди.

- “Локомотив” чемпион бўлган пайтларда ҳам “Қўқон-1912”ни ютолмасди, бу ноқулай рақиб. Ноқулай рақиб деган тушунчага қандай қарайсиз?

- Тўғри айтасиз, ўтган йилги мавсумда ҳам “Локомотив” билан ёмон ўйнамагандик. Лекин ўтган мавсумда бизда ҳам, “Локо”да ҳам таркиб бутунлай бошқа эди. Ноқулай ёки қулай деган тушунчага унчалик эътибор қилмайман. Ўйин охирида омадимиз келгани йигитларнинг охиригача курашгани билан боғлиқ.

- Бугун анчадан бери ўйин амалиётисиз қолаётган дарвозабон Ислом Абдуллаевни майдонга туширдингиз. Ўйинидан қониқдингизми?

Музаффар Абдуллаев ёмон ўйин кўрсатмаётганди. Аммо охирги пайтларда мағлубиятга учраб турганлигимиз сабабли Ислом Абдуллаевга имконият беришга қарор қилдик. Битта гол ўтказиб юборди, аммо Хуршид Мухторовни зарбани чиройли тарзда амалга оширганига қойил қолиш керак. Қолган вазиятларда Абдуллаев яхши ўйин намойиш қилди. Фақат биринчи бўлимда тўпни оёғи билан тепишда дарвозамиздан у қадар узоқлаштира олмади. Натижада тезлик билан “Локомотив”нинг ҳужумлари уюштирилишига сабаб бўлди. Фақат шу ҳолат бўйича эътироз бор. Ҳар бир дарвозабонимизга ишонч билдирсак бўлади. Бугунги ўйин учун мураббийларнинг қарори ўзини оқлади, дейиш мумкин.