Бельгия терма жамоаси футболчиси федерация билан клуб ўртасидаги келишмовчилик сабаб Испанияга қарши ўйинни ўтказиб юборди

Белгия терма жамоаси таркибида ҳаракат қиладиган ҳимоячи Зено Дебаст Испанияга қарши 10 июл куни бўлиб ўтадиган жаҳон чемпионати — 2026 чорак финалида майдонга тушмайди. Бу ҳақда Қироллик Бельгия футбол ассоциацияси (RBFA) расман маълум қилди.

Ассоциацияга кўра, футболчининг клуби — «Спортинг» унинг жисмоний ҳолати ҳали ўйинларда қатнашишга йўл қўймаслигини билдирган. Шу боис ҳимоячи Испанияга қарши учрашувни ўтказиб юборишга мажбур бўлади.

«Зено Дебаст чорак финалда иштирок эта олмайди. Унинг клуби — «Спортинг» футболчининг соғлиғини баҳолаб, ҳозирча расмий ўйинларга тайёр эмас, деб ҳисоблагани ҳақида ўйинчига хабар берди. Бу хулоса «қизил шайтонлар» тиббий штаби, шунингдек ФИФАнинг тиббий ва суғурта органлари фикридан фарқ қилади. Ҳозирги пайтда Зено RBFA жисмоний тайёргарлик бўлими назорати остида индивидуал тарзда машғулот ўтказмоқда», — дейилади RBFA баёнотида, The Athletic нашри келтирган иқтибосда.

Маълумот учун, Дебаст жаҳон чемпионатида ҳали бирор дақиқа ҳам майдонга тушмади. У «Спортинг» сафида олган оёқ жароҳати сабаб июн ойи охирига қадар терма жамоа билан умумий машғулотларда иштирок этмаган.