Биродар Абдураимов: Қани энди, терма жамоамизни Сёмин бошқарганидами...

Хабарингиз бўлса, яқинда россиялик таниқли мутахассис Юрий Сёмин sports.uz сайти учун эксклюзив интервью берганди. Унда ўзбек футболига доир бир қанча саволларга жавоб берган мутахассис Биродар Абдураимовга ҳам алоҳида тўхталиб ўтганди.

Илгари собиқ Иттифоқ даврида унга қарши рақиб сифатида ўйнагани ва кейинчалик дўстлашиб кетгани хусусида гапирганди. Ўз навбатида Биродар Абдураимов ўша интервьюдан кейин Юрий Павлович ҳақида фикр билдириб, у билан боғлиқ хотираларни эслади.   

- Юрий Сёмин аввал, Москванинг “Спартак” клубида ўйнаганди, - дея гап бошлади Абдураимов. - У ерда бир-икки йилча тўп сурганидан кейин, “Динамо”га ўтиб кетганди. Ушбу клубда кўп йиллар давомида фаолият олиб борди. Бошқалардан паст даражада ўйнамаган. Футболчилик фаолиятини тугатгач, унинг мураббийликдаги ишлари анча самарали кечди. Илгари “Локомотив” Россияда ўртамиёна жамоа эди. Юрий Павлович ушбу клубга келгач, “Локомотив”ни оёққа турғазди. Қатор совринларни олиб берди. Киевнинг “Динамо”сида ҳам ишлади.

Энди у билан бир-биримизни яқинроқ танишимизга келсак, Москвада ўйнаб юрганимда ўзим билан бирга танишим Олимжон Тўхтаохуновни олиб кетгандим. Ўшанда у Сёмин билан дала-ҳовлисида қўшни бўлган экан. Шу боис россиялик мураббий билан бир-биримизни кўрганимизда салом-алик қилардик, учрашганимизда, албатта, хурсанд бўлардик. Менга ёқмаган жиҳатига келсак, Сёминни “Локомотив”дан бўшатишга ҳаракат қилишди. Ваҳоланки, мураббий ўз клубида натижа кўрсатаётганди. Бир учрашувда Сёминни ҳурмат қиладиган, унинг истеъфосига қарши чиққан ҳолда “Локомотив” мухлислари ўйин бошлангач, 10 дақиқа ўтиб стадиондан чиқиб кетишди. Шундан кейин ярим мавсум ўтмасдан мана энди ўша клуб раҳбарлари ҳам кетишди. Юрий Сёмин катта ҳурматга эга мураббий. Шундай экан, унинг ҳурматини жойига қўйиб кузатиш керак. Барибир у яна мураббийлик ишини давом эттиради. Ҳали куч-қуввати, билими бор. Қайтанга, ундан кўп нарсаларни ўрганиш керак. Мана, ҳозир “Локомотив” қаерда юрибди? Ўз вақтида ундан кучли мураббий йўқ эди. Россия терма жамоасида ҳам ишлаганини биламиз. У ерда Сёминни мухлислари жуда кўп. Ҳалигача қўшниси Олимжон Тўхтаохунов орқали Юрий Павловичга саломимни айтиб тураман. Қани энди, Сёмин миллий терма жамоамизни бошқарганидами, натижа кўрсатиб берарди.

Биродар Абдураимов Сёмин ҳақидаги муносабатини билдириб бўлгач, вазиятдан фойдаланган ҳолда ундан “Пахтакор”даги ўзгаришлар, Арвеладзенинг кетиши ва клубнинг кейинги режалари хусусидаги фикрлари билан ҳам қизиқиб кўрдик.   

- Шота Арвеладзе “Пахтакор”да шунча йил ишлади. У янада ўсишни хоҳлади. Унга бошқа қизиқарли таклифлар бўлса, қабул қилади, албатта. Вақти келиб, жамоани ўзимизнинг маҳаллий мураббийлар бошқаради, деб ўйлайман. Агар бу борада мендан маслаҳат сўрашса, ўз фикримни айтишим мумкин. “Пахтакор”ни ким бошқармасин фақат муваффақият тилайман. Биламан, клуб доимгидек ўз жойини топади. Энг асосийси, биз Осиё Чемпионлар лигасида ўзимизни кўрсатишимиз керак. Ўзимизни чемпионатда ниманидир ютсангиз кейинчалик эсдан чиқиб кетади. Осиё майдонларида ҳам “Пахтакор”нинг муваффақият қозониш фурсати етган. Шунга жиддий тайёргарлик кўриш зарур, - деди Биродар Абдураимов.      

У Абдураимовга қарши тўп сурган, Қосимовни ёшлигидан билади ёхуд Самарқандни қўмсаётган Сёмин ўзбек футболи хусусида