Бизда бешта зўр ўйинчи бор

Кейинги ўн йилликда илк бор мавсумни совринсиз якунлаган “Ювентус” бош мураббийи Массимилиано Аллегри янги чемпионат олдидан жамоани қандай кучайтирмоқчи эканини ошкор қилди.

- Бизда беш нафар ўта иқтидорли ёш ўйинчилар - Влахович Локателли, де Лихт, Кьеза ва Миретти бор ва улар асосий жамоамиз учун жуда зўр ўйнаб беряпти. Улар бундан кейин ҳам ўсишга эришишига ишонаман.

Лекин фақат ёшлар ҳисобига катта ғалабаларни қўлга киритиш қийин. Ёшлик шижоати билан бой тажрибани уйғунлаштириш керак бўлади. Ёши катта ўйинчилар ёшларга қандай қилиб юксалишни кўрсатади. Биз таркибни шакллантиришда шуни инобатга оламиз, - деди Массимилиано Аллегри.

Сўнгги маълумотларга қараганда, туринликлар “Манчестер Юнайте”дан кетаётган Поль Погба ва ПСЖ билан хайрлашиб улгурган Анхель ди Мария билан шартнома имзолашга жуда яқин турибди.