"Бизга ҳар тарафлама фойдали бўлди ва яна пул ҳам беришяпти" - Жамшид Саидов Россиядаги турнир ва таркибдаги ўзгаришлар ҳақида

“Қизилқум” жамоаси Екатеринбургдаги халқаро турнирда иштирок этиб қайтди. Финалда мезбон – “Урал” жамоасига қарши майдонга тушди ягона гол эвазига навоийликлар мағлуб бўлдилар. Ҳозирда “Қизилқум” аъзолари қайтишган ва бироз хордиқ чиқаришяпти. Шундан фойдаланиб, Sports.uz журналисти жамоа бош мураббийи Жамшид Саидов билан суҳбатлашди.

- “Урал” клуби томонидан уюштирилган халқаро турнир учун таклифни қабул қилишингизга асосий сабаб нима бўлди ва умуман қандай таассуротлар пайдо бўлди?

- Бу турнир бўйича бизга май ойида таклиф бўлди. Биз бу таклифни дарҳол қабул қилдик. “Урал” клубига, вилоят губернаторига, барча ташкилотчиларга раҳмат айтмоқчимиз. Улар барча шароитларни яратиб беришди. Самолёт текин, еб-ичиш текин, қўйингки, барча шарт-шароитлар муҳайё қилинди. Ҳаммаси юқори даражада бўлди. “Екатеринбург арена”га кирганимизда йигитларга бу ерда жаҳон чемпионатида Франция ўйнаганини эслатдим. Асосий легионерларимизга дам олишлари учун уйларига рухсат бергандик. Бу турнирда кўпроқ ёшларга имконият бердик. Улар ишончни оқладилар. Тўртта жамоа қатнашди. Сербия, Тожикистон, Россия ва бизни жамоа. Ўйинлар ярим финал ва финалдан иборат бўлди. Биринчи ўйинда сербларни 3:0 ҳисобида ютдик. Финалда бизга бироз тажриба етишмади. Учрашувни дастлабки 15-20 дақиқасида футболчилар ҳаяжонланишди. “Урал” томонидан катта прессинг бўлди. Яхши легионерлари бор экан. Бу клубга яна премьер-лигага қайтиш вазифаси қўйилган. Лекин ёмон ўйнамадик.

- “Қизилқум”га финалга чиққани учун ташкилотчилар томонидан 30 минг доллар берилди, шундайми?

- Ҳа, 1-ўринга 50 минг доллар, 2-ўринга 30 ва 3-ўринга 20 минг доллар мукофот пуллари ажратилган. Бизга ҳар тарафлама фойда бўлди. Халқаро тажриба, йиғин ўтказдик ва яна пул беришяпти.

- У ерда жамоа учун янги легионерларни кўздан кечирганингиз ҳақида эшитдик...

- Ҳа, легионерлар билан гаплашдик. 16 июлдан Тошкентда бошлайдиган йиғинимизга 1-2 таси келиши мумкин. Ҳозир музокаралар давом этяпти. Биз асосан осиёлик легионерларни излаяпмиз.

- Финалда “Қизилқум” таркибида Асрор Ғофуровнинг ўйнагинини кўрдик. У жамоангизга ўтдими?

- Ғофуров бизга қўшилди. Охирги пайтларда Бангладеш чемпионатида тўп сурди. Мен уни яхши билардим. Менга айнан таянч зонасига Асрор керак эди. Худо хоҳласа, уни оламиз.

- “Қизилқум”ни ёзги йиғин тайёргарлиги қандай  кечади?

- 16 июлдан Тошкент шаҳрида шуғулланишни бошлаймиз. 20-куни “Андижон”, 23 июль куни “Арал” ҳамда 26-cанада “Локомотив”га қарши майдонга тушамиз. Балки уларни орасига яна битта ўйин қўшишимиз мумкин. 27 июлга қадар Тошкентда йиғин ўтказамиз.

- Легионерлар қачон етиб келишади?

- 16 ва 17 июль кунлари қўшиладилар.

- “Қизилқум”ни Файзиев ва Жўрабеков тарк этишди. Улардан ташқари яна кимлар кетди?

- Ҳозирча иккаласи. Қолганлари ҳали аниқ эмас. Янги маҳаллий футболчилар билан гаплашяпмиз. Яқин орада ҳал бўлади.

- Биринчи даврадан кейинги хулосаларингиз қандай ва қайси позицияларни кучайтириш зарур деб ҳисоблайсиз?

- Ўйлайманки, биринчи даврадаги иштирокимиз ёмон эмас. 50х50 дейиш мумкин. Бошида яхши бошланди. Кейин омадсиз учрашувлар, дуранглар қайд этилди. Кейин охирида ОКМКни ютдик ва ўйинчиларимизни руҳияти кўтарилди. Бизга катта мақсад қўйилмаган. Жамоамиз инфратузилмасида самарали ишлар олиб бориляпти. Биринчи даврани асосан сафарда ўтказдик. Навоийда шуғулланамиз ва уй ўйинини ўтказиш учун Қаршига борамиз. Бу футболчиларга руҳий томондан таъсир қилди. Лекин айтганимдек, ёмон эмас. 10 таликка кириш учун иккинчи даврада таркибни 4-5 нафар футболчилар билан кучайтирамиз.

Шуҳратбек Жўраев.