Бизга ўт, юз миллион евро тўлаймиз!

«Тоттенхэм» яна бир катта трансфер устида иш олиб бораётгани айтилмоқда. Журналист Алекс Крук хабарига кўра, лондонликлар «Борнмут» таркибида тўп сурётган Эли Жуниор Крупи учун курашга қўшилган ва унинг учун 85 миллион фунт стерлинг (деярли 100 миллион евро) таклиф қилишга тайёр.

«Борнмут» раҳбарияти эса бир неча бор 20 ёшли иқтидорли футболчини жорий трансфер ойнасидан сотиш нияти йўқлигини таъкидлаган. Шу билан бирга, «Тоттенхэм» клуби «Борнмут» хўжайинларининг фикрини ўзгартириш учун жуда катта молиявий таклиф билан чиқишга умид қилмоқда.

Эли Жуниор Крупига қизиқиш фақат «Тоттенхэм» билан чекланиб қолмаяпти. Турли манбаларга кўра, унга ПСЖ, «Барселона», «Арсенал», «Челси» ва яна бир қатор етакчи клублар назар ташламоқда.

Transfermarkt портали маълумотича, ёш француз ҳужумчисининг бозор қиймати ҳозирча 70 миллион евро атрофида баҳоланмоқда.