Бразилия терма жамоасининг янги бош мураббийи ким бўлиши маълум

Хабарингиз бор, Доривал Жуниор истеъфога чиқарилганидан кейин Бразилия терма жамоаси бош мураббийсиз бўлиб турибди. "UOL Esporte" нашри хабарига кўра, Саудия Арабистонининг "Ал-Ҳилол" клубининг амалдаги мураббийи Хорхе Жезус Бразилия терма жамоасининг янги бош мураббийига айланади.

Манбага кўра, Бразилия футбол федерацияси раҳбарияти "Ал-Ҳилол"га мураббий учун 2,5 миллион евро тўлайди. Қайд этилишича, 70 ёшли португалияликнинг терма жамоадаги маоши Саудия Арабистонидагидан тахминан беш баравар кам бўлади. 

Маълумот учун, "пентакампеонлар" "ЖЧ-2026 саралаши" турнири якунланишига тўрт тур қолганида 21 очко билан турнир жадвалида тўртинчи ўринни эгаллаб турибди. Бразилияликлардан юқорида Уругвай, Эквадор ва Аргентина жойлашган.