Бу мутлақо мантиқсизлик ёхуд "Челси" Томас Тухелни нега истеъфога чиқарди?

Немис мураббийларига Чемпионлар Лигасининг янги мавсумининг старти омадсиз бўлди. Доменико Тедеско "Шахтёр"дан учралган дахшатли мағлубиятдан сўнг "Лейпциг" бошқарувидан четлатилди. Аммо куннинг энг сенсацияси эса Томас Тухелнинг "Челси" бош мураббийлик лавозимидан озод қилингани бўлди. Боиси, Томаснинг “аристократлар” бошқарувидан кетиши кўпчилик учун кутилмаган эди.

“Челси” раҳбарияти мураббийнинг истеъфосини қандай изоҳлади?

Клуб қуйдагича баёнот берди:

“Челси” раҳбарияти барча мухлислар ҳамда клубда фаолият олиб бораётганлар номидан Томас ва унинг ёрдамчиларига ўз миннатдорчилигини билдиради. Тухель Чемпионлар лигаси, Европа суперкубоги ва клублар ўртасидаги жаҳон чемпионатидаги ғалабалар билан ҳақли равишда клуб тарихидан ўз номини қолдира олди.

Янги раҳбарларининг “Челси” бошқарувига келганига 100 кун бўлди ва улар жамоанинг ўйинида ўзгаришларни амалга ошириш учун астойдил ҳаракат қилишда давом этмоқда. Янги хўжайинлар мураббийни алмаштириш вақти келди деб ўйлашади. Шу боис, Тухелни ишдан бўшатишга қарор қилди.

“Челси”даги ёрдамчи мураббийлар штаби жамоани бўлажак ўйинларга тайёрлаш ва машғулотларини ўз зиммасига олади. Клуб янги бош мураббийни тайинлаш йўлида ҳаракатни бошлаб юборган.

Янги мураббий тайинланмагунча бошқа изоҳ берилмайди”.

Тухелни ишдан бўшатиш мантиққа тўғри келмайди

Келинг, бу борада бироз тўхталамиз ва нега раҳбариятнинг қарори мантиққа тўғри келмаслиги бўйича фикр юритамиз.

Биринчидан, Тухель "Челси"да мавсумни ёмон бошламади. Ҳа, Чемпионлар лигаси 1-турида омадсизлик юз берди. Ҳа, Премьер лигада икки марта мағлубиятга учради. Аммо ЕЧЛда фақат битта учрашув бўлиб ўтди ва ҳаммаси ҳали олдинда эди. АПЛда эса “Челси” 10 очко билан 6-поғонани банд этиб турибди. Бу ҳам истеъфога сабаб бўла олмайди.

Иккинчидан, Тухель жамоани янги мавсумга тайёрлаб бўлганди. Янги мураббий эса тезлаштирилган режимда ва жуда ҳам зич тақвим билан иш бошлайди. Бу эса жамоанинг ўйинига салбий таъсир ўтказиши мумкин.

Учинчидан, клуб раҳбарияти мавсумдан олдин Тухелнинг трансферларига катта миқдорда сармоя киритди. "Челси" Томаснинг хоҳиши билан Уеэли Фофана, Марк Кукурелья, Рахим Стерлинг, Калиду Кулибали, Карни Чуквуэмека ва Пьер-Эмерик Обамеянг учун 281 миллион евро сарфлади.

Тўртинчидан, 20 август куни Тухель "Челси" билан янги шартнома борасида музокара олиб бораётгани ҳақида гапирди. Уч ҳафтадан камроқ вақт ичида эса мураббий ишдан олинди.

Бешинчидан, "Челси" хўжайини Тодд Боэли клуб Тухелга охиригача ишонишини айтган эди: "Биз Томас билан ишлашдан мамнунмиз. У жамоанинг ўйинида қандай ўзгаришлар қилаётганини яхши биламиз. Ўйлайманки, "Челси" Томас билан катта мусобақаларда ғалаба қозонади".

Бироқ икки ой ўтгач, "Челси" Тухелни истеъфога чиқарди.

Нима сабабдан "Челси" Тухелни ишдан олди?

Ҳозирча аниқ маълумот йўқ. Раҳбариятда ишлайдиганларнинг ҳеч бири бу ҳолат борасида батафсил тўхталмаган. Инсайдерлар ҳам бу борада аниқ маълумотга эга эмаслигини билдиришди. Бироқ клубга яқин бўлган баъзи манбалар қарор бўйича ўз тахминларини билдиришди. Жумладан, журналист Метт Лоунинг фикрларини мисол қилиб келтира оламиз: сабаби, у бир неча бор клуб билан боғлиқ маълумотларни биринчи бўлиб ОАВга маълум қилган (масалан, Рахим Стерлингнинг "Челси"га ўтиши ҳақида). Мана унинг маълумотлари:

Премьер лиганинг олти тури ва Чемпионлар лигасидаги биринчи ўйиндан кейинги натижалар вазиятга таъсир қилмаган: клуб аввалдан мураббийни алмаштиришни режа қилиб келаётган эди. Тодд Боэли "Динамо" билан ўйин олдидан қарор қабул қилди. Загребдаги мағлубият эса буни тезлашиб кетишига сабаб бўлди.

1. Ўйинчиларнинг Тухелга нисбатан ишончсизлиги ортди: у тез-тез таркибда ротация ишларини амалга оширди, шунингдек, аниқ бир ўйин схемаси бўйича ҳаракат қилмаган. Футболчиларда нега аниқ оптимал таркиб танлаб олинмагани, қолаверса, ўйин пайтида тактик схемада кўп бора ўзгариш бўлиши борасида саволлар кўп эди.
   
   
2. Боэли Тухель билан узоқ муддатли лойиҳани қуришга тайёр эди, лекин яқинда бўлган бир қатор келишмовчиликлар туфайли у фикрини ўзгартирди. Тодд ҳафта бошидан бери “Челси” бош мураббийлиги учун янги номзодларни кўриб чиқаётгани маълум қилинди.
   
   
3. Можаролар сабабларидан бири Тухелнинг трансфер ойнасидан сўнг Боэли унга қўшимча масъулият юклаганидан норозилигидир. Бироқ янги раҳбарнинг қарорини ҳам тушунса бўлади, боиси, барча трансферлар Тухелнинг истаги билан амалга оширилган.
   
   
4. Қолаверса, Томаснинг Роналду билан шартнома имзолашдан бош тортгани Боэлига унчалик ёқмади.
   
   

Кейинчалик нима бўлади?

Томас Тухел ўзига янги иш қидираётгани аниқ. “Daily Mail” нашри хабарига кўра, "Челси" унга 13 миллион фунт жарима тўлайди. Томаснинг мураббийлар штаби эса 2 миллион евро олади

"Челси" янги бош мураббий қидирмоқда. Инглиз оммавий ахборот воситалари қуйидаги номзодларни маълум қилди:

“Брайтон” устози Грэм Поттер. Манбада айтилишича, бу “Челси” учун энг яхши номзод бўлиб, раҳбарияти аллақачон у билан боғланган;

Яна кимдир Зинедин Зидан ҳақида ёзади. Кимдир эса Маурицио Почеттино номзодини илгари сурган. Аммо кўплаб таниқли нашрлар бу маълумотни тасдиқламади.

Жамшидбек Маҳмудов тайёрлади