Бу йилги “Олтин бутса”нинг Топ-10 тўпурарлари

Лионель Месси бу йилги “Олтин бутса” совринига эга чиқди ва бу йўлда у Муҳаммад Салоҳ, Криштиану Роналду ва Ҳарри Кейн каби номдор ҳужумчиларни ортда қолдирди. Goal нашри Европанинг энг нуфузли индивидуал соврини учун курашган Топ-10 ҳужумчини ёдга олди.

Лионель Месси, “Барселона”, 34 гол (68 очко)

Олдинги мавсумлардагидек сермаҳсул ўйин кўрсата олмаган бўлсада Леонинг Ла Лигадаги 34 голи 5- “Олтин бутса”сини ютиб олишига етарли бўлди. У бу борада рақиби Роналдудан илгарилаб кетди.

Муҳаммад Салоҳ, “Ливерпуль”, 32 гол (64 очко)

“Ливерпуль” юлдузига айланган Салоҳ Премьер Лига тўпурарлари рўйхатида карвонбошилик қилди. Бироқ унда Мессини қувиб ўтишига бир нечта гол етишмади. Салоҳнинг юқори спорт формаси билан “Энфильд”да кучли ҳужум учлигини ташкил қилди.

Ҳарри Кейн, “Тоттенхем”, 30 гол (60 очко)

Ҳарри Кейн Премьер Лига тўпурарлигини сўнгги икки мавсум ўзида сақлаб келди. Бироқ у бу мавсумда Салоҳга имкониятни бой берди. Мавсум стартини анча бўш бошлаган “Тоттенхем” тўпурари кейинроқ ўзига келиб олди ва Салоҳга жиддий рақобат кўрсатди. Ҳужумчи Жаҳон Чемпионатида бемалол ўзини кўрсата олиши мумкин.

Чиро Иммобиле, “Лацио”, 29 гол (58 очко)

Чиро Иммобиле бу сафар ўзининг энг яхши мавсумларидан бирини ўтказди, десак муболаға бўлмайди. “Боруссия Дортмунд”нинг собиқ ҳужумчиси “Лацио”да асосий фигурага айланди ва А Сериянинг тўпурарига айланди.

Роберт Левандовски, “Бавария”, 29 гол (58 очко)

Энг яхши ҳужумчилардан бири сифатида қараладиган “Бавария” вакили сўнгги икки мавсумда 30 лик довондан ошарди. Бироқ бу йилги мавсумда у бироз сусткашликка йўл қўйди. Польшалик ҳужумчи шунга қарамай, Германия Бундеслигасининг тўпурарига айланган.

Мауро Икарди, “Интер”, 29 гол (58 очко)

“Интер” юлдузи Мауро Икарди А Сериянинг сўнгги тўрт йилидан бери энг яхши тўпурарларидан бирига айланди. У ҳатто 2015-йилги мавсум тўпурари бўлган ҳам эди. Аргентиналик футболчи “Интер”нинг сардорига айланиб олган ва “нерадзуррилар” учун намуна кўрсатишда давом этмоқда.

Эдинсон Кавани, “ПСЖ”, 28 гол (56 очко)

Уругвайлик ҳужумчи сўнгги йилларда “ПСЖ”нинг асосий қуролига айланиб олган. У Ибрагимовичнинг жамоадан кетиши ва Неймарнинг жароҳатидан кейин бутун масъулиятни ўз зиммасига олди. Кавани 1 Лиганинг ҳар қандай футболчисидан кўп гол урган ва жамоасининг чемпионатни ютишида муҳим ҳиссасини қўшди.

Жонас, “Бенфика”, 34 гол (51 очко)

Бразилиялик “қария” ҳужумчи “Бенфика”да сенсацион мавсумни ўтказди. У голлари сони бўйича Мессига етиб олди. Аммо Португалия чемпионатининг кучли бешликка кира олмаган сабабли очколар бўйича кам балл жамғарди.

Криштиану Роналду, “Реал Мадрид”, 26 гол (52 очко)

“Олтин тўп”нинг амалдаги соҳиби 2009-йилда Ла Лигага келиб қўшилганидан бери энг ёмон мавсумини ўтказди. Аммо 2008-йилга келиб у аввалги спорт формасини тиклай олди ва “Олтин бутса” учун курашга қайта қўшилди.

Луис Суарес, “Барселона”, 25 гол (50 очко)

Икки карра “Олтин бутса” соҳиби бўлган Суарес “Барселона”га келиб қўшилганидан бери ҳужум чизиғида анча фаоллик кўрсатмоқда. У мавсум аввалида орттириб олган жароҳати билан стартни ёмон бошлаган бўлсада, тезда ўзини ўнглаб олди ва мухлисларини хурсанд қилди.